ShQO-da bıyl órt qaýipsizdigi talaptarynyń saqtalmaýynan 130-dan astam órt shyqty

ÓSKEMEN. QazAqparat – Shyǵys Qazaqstan oblysynda 2021 jyldyń basynan beri órt qaýipsizdigi talaptarynyń saqtalmaýynan 130-dan astam órt shyqqan, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 21 mamyr kúni tańǵy saǵat 06:00 shamasynda Shemonaıha qalasyndaǵy Halyq kóshesinde ornalasqan jeke turǵyn úıdiń aýlasynda órt shyqqan.

«Belgili bolǵandaı, jalyn sharýashylyq qora-jaılardyń aǵash qurylymdaryn sharpyǵan. Oqıǵa ornyna órt sóndirýshiler shuǵyl jetip, jalpy aýdany 48 sharshy metrdi quraǵan tilsiz jaýdy aýyzdyqtady. Órttiń saldarynan qora ishindegi 27 taýyq qyrylǵan. Aldyn ala málimet boıynsha ottyń shyǵýyna – elektr jabdyqtaryn montajdaý jáne paıdalaný kezinde órt qaýipsizdigi talaptarynyń saqtalmaýy sebep bolýy múmkin», - dep habarlady vedomstvo ókilderi.

Aıta keteıik, Shyǵys Qazaqstanda jyl basynan beri órt qaýipsizdigi talaptarynyń saqtalmaýynan 130-dan astam órt shyqty.