ShQO-da bıyl órt qaýipsizdigi erejesiniń saqtalmaýynan 109 órt shyqty

ÓSKEMEN. QazAqparat – Shyǵys Qazaqstan oblysynda jyl basynan beri elektr jabdyqtaryn paıdalaný kezinde órt qaýipsizdigi erejeleriniń buzylýy saldarynan 109 órt shyqqan, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, turǵyn úılerde órttiń shyǵýyna kóbinese elektr jabdyqtary sebepker bolyp jatady. Naqty aıtqanda, jabdyqtardy paıdalaný kezinde órt qaýipsizdigi erejesiniń buzylý, elektr jelisiniń aqaýy nemese tozýy, elektr symdarynyń shamadan tys júktelýi jáne qysqa tuıyqtalýy.

Jyl basynan beri oblysta elektr jabdyqtaryn montajdaý jáne paıdalaný kezinde órt qaýipsizdigi talaptarynyń saqtalmaýyna baılanysty 109 órt bolǵan. Tek sońǵy úsh kúnniń ishinde órt sóndirýshiler osyndaı sebepke baılanysty shyqqan 3 jalyndy aýyzdyqtady.

«Máselen, 25 maýsymda Shemonaıha qalasy Stantsıonnaıa kóshesinde jeke úı órtendi. 14 sharshy metr aýmaqty sharpyǵan «tilsiz jaý» jıhazdar men jeke zattardy zaqymdady. Sondaı-aq 27 maýsymda Glýbokoe kentindegi Stepnaıa kóshesinde órt sóndirýshiler jer úıdegi otpen kúresti. Jalpy aýdany 51 sharshy metrdi sharpyǵan órt shatyrdyń aǵashtaryn , qabyrǵany, jıhaz, turmystyq tehnıka men jeke zattarǵa tarady», - delingen habarlamada.

Budan bólek, sol kúni Cheremshanka aýylyndaǵy Lenınogorskaıa kóshesinde jeke úı men qora órtendi. Órtti baıqaǵan úı ıeleri aldymen zattardy syrtqa shyǵarýǵa tyrysqan. Sol kezde 70 jastaǵy qarııanyń denesin 10% kúıik shalyp, Rıdder qalasynyń aýrýhanasyna jetkizildi. Oqıǵa ornyna kelip jetken órt sóndirýshiler aýmaǵy 100 sharshy metrge jetken órtti sóndirdi.