ShQO-da bıyl myńǵa jýyq órt shyǵyp, 33 adam kóz jumdy

ÓSKEMEN. QazAqparat – Shyǵys Qazaqstan oblysynda tótenshe jaǵdaılar komıssııasynyń kezekti otyrysy ótti, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetinshe, oblys ákiminiń orynbasary Erjan Nurbaevtyń tóraǵalyǵymen ótken komıssııa otyrysynda birqatar ózekti másele qaraldy. Onyń biri – aldaǵy jylytý maýsymynda turǵyn úılerdiń órt qaýipsizdigin qamtamasyz etý.

Jyl basynan beri oblysta 950 órt tirkelgen. Qyzyl jalyn sharpyǵan jer úılerdiń sany 582-ni qurap otyr. Tilsiz jaýdan 33 adam mert bolyp, ıis tıgen 56 adam aýrýhanaǵa jetkizildi. Kóp jaǵdaıda órttiń shyǵýyna – otty abaısyz qoldaný (249 oqıǵa), pesh paıdalaný kezinde qaýipsizdik talaptaryn saqtamaý (160), elektr jabdyqtaryn montajdaý jáne paıdalaný erejelerin buzý (81) sebep bolýda.

«Jylytý maýsymyna daıyndyq jumystary shilde aıynda bastalǵan. Oblys boıynsha barlyǵy 238 110 jeke turǵyn úı bar. Órt oqıǵalaryn boldyrmas úshin halyq arasynda túsindirý jumystary júrgizilýde. Qutqarýshylar ásirese áleýmettik osal toptaǵy 8172 otbasyǵa erekshe nazar aýdarǵan», - delingen habarlamada.