ShQO-da bıyl qutqarýshylar páterde qamalyp qalǵan 340 adamǵa kómekke keldi
ÓSKEMEN. QazAqparat – Shyǵys Qazaqstan oblysynda jyl basynan beri qutqarýshylar páterde qamalyp qalǵan 340 adamǵa kómekke kelgen, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha jyl basynan beri 340 adam páter esigin asha almaı, ishte qamalyp qalǵan. Oqıǵa ornyna kelip jetken qutqarýshylar olarǵa kómek kórsetti. Kóp jaǵdaıda páterde balalar men qarttar qamalyp qalyp jatady.
«Mamandar adam ómirine qaýip tóngen kezde ǵana esikti ashyp beredi. Máselen, páter ishinde qarshadaı balalar, zeınetkerler nemese múmkindigi shekteýli jandar bolsa. Sondaı-aq órtke ákelip soǵýy yqtımal qosýly qalǵan elektr jabdyqtary, gaz qondyrǵylary, jylytý quraldary bolsa kómek kórsetiledi», - dedi oblystyq TJD Órt sóndirý jáne avarııalyq-qutqarý jumystary qyzmeti bastyǵynyń orynbasary Bolat Nurdybaev
Onyń aıtýynsha, barlyq qutqarý jumystary sátti aıaqtalǵan.
