ShQO-da bıyl qansha turǵyn úı salynady
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov aımaqtaǵy turǵyn úı qurylysy týraly kezekti jıyn ótkizdi, dep habarlaıdy QazAqparat tilshisi.
Oblys boıynsha 2016 jyldan bastap ótken jylǵa deıin 2,1 mln sharshy metr turǵyn úı paıdalanýǵa berilgen. Jyl saıynǵy ortasha ósim 110,4%-dy quraıdy. Tek byltyrdyń ózinde 519,8 myń sharshy metr turǵyn úı qoldanysqa berildi. Dese de Óskemen qalasyndaǵy qurylys qarqyny kóńil kónshitpeıdi.
«Ótken jyly Óskemende turǵyn úıdi paıdalanýǵa berý jospary oryndalmady. Bıyldyń І jartyjyldyǵynda da mardymdy is bitiretinine senim joq. Sondyqtan Ekonomıka jáne bıýdjettik josparlaý basqarmasyna «ShQO-nyń 2020 jylǵy áleýmettik-ekonomıkalyq damýynyń qorytyndylary jáne 2021 jyldyń birinshi jartyjyldyǵyna arnalǵan mindetter týraly» oblys ákimdigi qaýlysynyń jobasyn qaıta pysyqtaýdy tapsyramyn. Eger Óskemen qalasy boıynsha kópqabatty turǵyn úı qurylysy josparly túrde oryndalmasa, qarajatty aýdandarǵa bólýimiz qajet. Sol arqyly aýdan ortalyqtarynda birqabatty turǵyn úı salý isine qarqyn bergen abzal», - dedi Danıal Ahmetov.
Osy rette aımaq basshysy Óskemen qalasynyń ákimdigi usynǵan qurylys bıyl aıaqtalyp, azamattarǵa paıdalanýǵa berilýi tıis turǵyn úılerdiń kestesin qaıta qaraýdy tapsyrdy.
«Bul másele tek Óskemenge emes, barlyq aýdan, qalalarǵa qatysty. Sondyqtan Qurylys basqarmasyna ár turǵyn úıdiń qurylysyn aıaqtaý kestesimen qatar, turǵyndardy qonystandyrý kestesin jasaýdy tapsyramyn. Eger ár ákimniń qoly qoıylǵan kestedegi meje oryndalmasa, tıisti jaýapkershilik júkteledi», - dedi ShQO ákimi.
Sondaı-aq Danıal Ahmetov paıdalanýǵa beriletin nysandardyń barlyǵynda der kezinde ınjenerlik-kommýnıkatsııalyq ınfraqurylymdy tartyp, abattandyrý jumystaryn júrgizý qajettigin aıtty.
2021 jyly Shyǵys Qazaqstanda qarjylandyrýdyń barlyq kózderi esebinen 577,2 myń sharshy metr turǵyn úı salý josparlanyp otyr.
