ShQO-da bıyl elektr jabdyqtaryn paıdalanýda qaýipsizdik erejelerin saqtamaýdyń saldarynan 26 órt shyqty
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha jyl basynan beri elektr jabdyqtaryn paıdalaný kezinde qaýipsizdik erejelerin saqtamaýdan 26 órt shyqty. Statıstıka kórsetkendeı, kóp jaǵdaıda qyzyl jalynnyń shyǵýyna uzartqysh toqty qoldaný sebep bolǵan.
«Turǵyndar uzartqyshqa bir ýaqytta birneshe elektr aspaptaryn qosyp qoıyp jatady. Ol azdaı, ony uzaq ýaqyt boıy toqqa qosyp qoıady. Bul óte qaýipti. Sondyqtan azamattarǵa uzartqyshty tek ýaqytsha jáne qysqa ýaqytqa ǵana paıdalaný kerektigin eskertemiz», - delingen aqparatta.
Osy rette, qutqarýshylar turǵyndarǵa qaýipsizdik erejelerin eske saldy:
- Aqaýy bar elektr jabdyqtaryn paıdalanbańyz;
- Zaqymdanǵan symdar men kabelderdi qoldanýǵa bolmaıdy;
- Elektr symdary men kabelderdi baılap, buraýǵa bolmaıdy;
- Normatıvtik qujattarmen qadaǵalaýsyz paıdalanýǵa ruqsat etiletin aspaptardy qospaǵanda (tońazytqyshtar, faks, modem jáne basqa da osy sekildi jabdyqtar) elektr jelisine qosylǵan jylytý aspaptaryn, elektr plıtalaryn, teledıdarlardy qaraýsyz qaldyrmańyz.