ShQO-da bıyl aýyl sharýashylyǵy daqyldary 1393 myń gektarǵa egiledi
ÓSKEMEN. QazAqparat – Shyǵys Qazaqstan oblysynda kóktemgi egistik jumystary bastaldy. Bıyl aýyl sharýashylyǵy daqyldary 1393 myń gektarǵa egilmek, dep habarlaıdy QazAqparat tilshisi.
ShQO Aqparat ortalyǵynyń málimetine súıensek, osy jyly dándi jáne dándi-burshaqty daqyldardyń egistik alqaby 601,9 myń gektardy qurap otyr. Al maıly daqyldar – 484,7 myń gektar, mal azyǵy daqyldary – 274,4 myń gektar, kartop – 19 myń gektar, kókónis jáne baqsha daqyldary – 13,3 myń gektar.
«Kóktemgi egistik kezeńinde jalpy aýyl sharýashylyǵy daqyldary 1393 myń gektarǵa egiledi dep josparlanýda. Búginde barlyq daqyl tuqymynyń 54%-y óńir aýmaǵyna jetkizilgen. Jetkizýshi «QazAzot» AQ ammıak selıtrasynyń baǵasyn 200 myń teńgeden 160 myń teńgege deıin tómendetti», - delingen habarlamada.
Egistik jumystary bastalmas buryn aýyl sharýashylyǵy daqyldary tuqymdarynyń sapasy jiti tekserildi. Óńirdegi sharýa qojalyqtarynda barlyq qajetti tehnıka bar. Josparlanǵan jumys kólemin oryndaý úshin 33 myń tonna dızel otyny bólindi.
Bıylǵy kóktemgi egis jáne egin jınaý jumystary úshin oblystyq bıýdjetten 6 mıllıard teńge sýbsıdııa qarastyrylǵan. Bul ótken jylmen salystyrǵanda 577 mıllıon teńgege artyq.
Esterińizge sala ketsek, osyǵan deıin ShQO-da úshinshi maı óńdeý zaýyty ashylatyndyǵyn habarlaǵan edik.
