ShQO-da bıyl aýdıologııalyq skrınıngten ótken 18 myńnan astam balanyń 15-inde syrqat anyqtaldy
ShQO Densaýlyq saqtaý basqarmasynyń málimetine súıensek, balalardyń medıtsınalyq kómekke qoljetimdiligi máselesi basty nazarda. Ásirese shala týǵan shaqalaqtardy neonataldy tekserýdiń mańyzy zor.
«Bıyl barlyǵy 2200 shaqalaq osyndaı tekserýden ótti. Onyń ishinde bireýinde fenılketonýrııa aýrýy anyqtaldy. Bul amın qyshqyldary men onyń metabolıtteriniń fızıologııalyq suıyqtyqtar men tinderde jınalýymen, keıinnen ortalyq júıke júıesiniń aýyr zaqymdanýymen sıpattalatyn týa bitken patologııa. Fenılketonýrııa jańa týǵan 10 myń náresteniń tek bireýinde ǵana kezdesedi», - deıdi basqarmanyń Ana men balany qorǵaý bóliminiń basshysy Aıjan Qomshabaeva.
Oblys boıynsha 18 034 jańa týǵan náreste men alty jasqa deıingi bala aýdıologııalyq skrınıngten qamtylǵan. Onyń ishinde estý qabiletiniń 1-2 dárejeli tómendeýimen 13 bala, 3-4 dárejeli tómendeýimen eki bala tirkeldi. Úsh jasqa deıingi 11 478 bala psıhofızıkalyq damý buzylystaryn erte anyqtaý maqsatynda tekserildi. Balalardyń 1 paıyzynda buzýshylyqtar anyqtaldy.
Sondaı-aq shala jáne óte az salmaqpen týǵan 73 shaqalaq retınopatııaǵa oftalmologııalyq skrınıngten ótti. Olardyń úsheýine kórsetkishteri boıynsha hırýrgııalyq em jasaldy.
