ShQO-da bıyl 82 myńǵa jýyq adam júrgizýshi kýáligin aldy
ÓSKEMEN. QazAqparat – «Azamattarǵa arnalǵan úkimet» ShQO fılıalynyń mamandary júrgizýshi kýáligin alýdyń 5 qadamyn aıtyp berdi, dep habarlaıdy QazAqparat tilshisi.
«Aldymen bilim alý úshin oqý kýrsyn tańdaýyńyz qajet. Jol qozǵalysy erejeleriniń teorııasyn óz betińizshe de meńgerýge bolady. Biraq kólik júrgizý sabaqtaryn mindetti túrde nusqaýshymen ótińiz. Ekinshi qadam – qujattar jınaý. Qajetti qujattar – jeke kýálik, 073 úlgisindegi medıtsınalyq anyqtama, avtokýrsty bitirgeni týraly kýálik jáne memlekettik baj salyǵyn tólegenińiz týraly túbirtek», - dep habarlady fılıaldyń baspasóz qyzmeti.
Memlekettik baj mólsheri – 1,25 AEK-ti quraıdy. Úshinshi qadam – teorııalyq emtıhan.
«40 mınýt ishinde 40 suraqtyń 32-sine durys jaýap berseńiz, emtıhandy sátti tapsyrǵanyńyz. Keıin avtodromda praktıkalyq emtıhan ótýińiz qajet. Munda kólikpen 12 jattyǵýdy oryndaýǵa 20 mınýt ýaqyt beriledi. Sońǵysy – daıyn qujatty alý. Eki emtıhandy da sátti tapsyrsańyz, sizge júrgizýshi kýáligi beriledi. Al júrgizýshi kýáligin aýystyrý tipti ońaı. Elektrondy portalda ótinimge fotosýret jáne qoltańbanyń skanerlengen sýretin qosa júkteısiz. Jeke kabınette qujattyń daıyn ekendigi týraly habarlama alǵannan keıin mamandandyrylǵan HQO-ǵa baryp tek daıyn júrgizýshi kýáligin alyp ketesiz», - delingen aqparatta.
Aıta keteıik, jyl basynan beri oblystyń mamandandyrylǵan HQO-lary arqyly 82 myńǵa jýyq adam júrgizýshi kýáligin alǵan.
