ShQO-da bıyl 8 mln aǵash otyrǵyzylady – mınıstr Súleımenova

ÓSKEMEN. QazAqparat – Bıyl Shyǵys Qazaqstan oblysynda 8 mln aǵash otyrǵyzylady. Bul týraly Ekologııa jáne tabıǵı resýrstar mınıstri Zúlfııa Súleımenova aıtty, dep habarlaıdy QazAqparat tilshisi.

ShQO aqparat ortalyǵynda baspasóz máslıhatyn ótkizgen Ekologııa jáne tabıǵı resýrstar mınıstri Zúlfııa Súleımenova óńirdegi tabıǵat qorǵaý maqsatynda atqarylyp jatqan sharalar týraly aıtyp berdi.

Onyń sózinshe, Qazaqstanda 5 jyl ishinde 16 apatty sý qoımasynda rekonstrýktsııa jumystary júrgiziledi. Onyń ishinde Shyǵys Qazaqstan oblysynda 2 sý qoımasy (Zaısan jáne Tarbaǵataı aýdandarynda) qalypqa keltirilmek.

«Orman sharýashylyǵy salasyna qatysty aıtar bolsaq, óńir boıynsha 2 mlrd aǵash otyrǵyzylady. Sońǵy eki jylda 1300 gektar aýmaqqa 6,1 mln aǵash egilgen. Al osy jyldyń sońyna deıin oblysta 1500 gektar jerge 8 mln aǵash otyrǵyzylady dep josparlanyp otyr», - deıdi Zúlfııa Súleımenova.

Sonymen qatar Shyǵys Qazaqstan oblysynda balyq sharýashylyǵyn damytý boıynsha birqatar jumys júrgizilip jatyr. 7 jyl ishinde aımaqta balyq ósirý kólemin 9,7 myń tonnaǵa jetkizý kózdelgen. 2023 jyldyń úsh aıynda oblysta 769 tonna taýarlyq balyq ósirildi.

foto - ShQO aqparat ortalyǵynan