ShQO-da bıyl 7,5 myń muǵalim arnaıy kýrstan ótedi
ÓSKEMEN. QazAqparat – Shyǵys Qazaqstan oblysynda 2020 jyly 7500 muǵalim biliktiligin arttyrmaq, dep habarlaıdy QazAqparat.
«Qazirde mektep oqýshylarynyń 95% jańartylǵan mazmun boıynsha bilim alyp jatyr. Bıyl 11-shi synyptar da bul baǵdarlamaǵa kóshedi. Osy oraıda pedagogtardy arnaıy kýrstardan ótkizýdiń mańyzy zor. Aımaq boıynsha 6,5 mlrd teńge bólinip, 9152 muǵalim biliktiligin arttyrǵan», - dedi ShQO Bilim basqarmasynyń basshysy Saırangúl Jumadilova bilim salasyna arnalǵan jıyn barysynda.
Bıyl 7,5 myń muǵalim arnaıy kýrstan ótpek. Jańa oqýlyqtar satyp alýǵa 1,5 mıllıard teńge bólingen.
«Óńirimizdegi 43 mekteptiń dırektory joq. Sondaı-aq bilim ordalaryna 267 muǵalim jetispeıdi. Tapshylyq ásirese Óskemen, Rıdder qalalary men Ulan, Tarbaǵataı, Aıagóz, Katonqaraǵaı, Kókpekti aýdandarynda baıqalyp otyr. Kóbinese aǵylshyn, matematıka, orys tili men ádebıeti jáne bastaýysh synyp muǵalimderi qajet. Al jyl saıyn pedagogıkalyq joǵary oqý oryndary men kolledjderdi 2 myńnan astam stýdent bitirýde. Alaıda olardyń 500-i ǵana mamandyq boıynsha jumysqa ornalasady», - deıdi basqarma basshysy.
