ShQO-da bıyl 58 jasóspirim quqyq buzýshylyq jasaǵan
Onlaın formatta ótken birińǵaı ata-analar jınalysyna 1400-ge jýyq adam qatysqan. Olardyń ishinde muǵalimder, ata-analar, psıhologtar, densaýlyq saqtaý salasynyń, quqyq qorǵaý organdarynyń jáne Tótenshe jaǵdaılar departamentiniń ókilderi bar. Talqylanǵan basty taqyryptardyń biri – balalardyń jazǵy demalysyn uıymdastyrý.
«Kámelettik jasqa tolmaǵandardyń quqyq buzýshylyq jasaýynyń aldyn alý, kanıkýl kúnderinde olardyń qaýipsizdigin qamtamasyz etý máselelerinde ata-analar nemquraılylyq tanytpaýy kerek. Ókinishke qaraı, oblysta mektep oqýshylarynyń zań buzýy az tirkelip jatqan joq. Jyl basynan beri polıtsııaǵa 6 213 jasóspirim jetkizildi, onyń 58-i quqyq buzýshylyq jasaǵan», - dedi ShQO Polıtsııa departamenti Jergilikti polıtsııa qyzmetiniń aǵa ınspektory Qarlyǵash Qudekenova.
Budan bólek, jasóspirimder arasynda erte júktiliktiń aldyn alý máselesi ózekti bolyp otyr. Bıyl 69 mektep oqýshysy bosansa, 34 qyz jasandy túsik jasatqan. Búgingi tańda kámelettik jasqa tolmaǵan 70-ten astam qyz júktilik boıynsha tirkeýge alynǵan. Statıstıka boıynsha júkti bolǵan jasóspirimderdiń 30 paıyzy jasandy túsik jasatýda.
«Mundaǵy basty sebep – jynystyq tárbıeniń durys berilmeýi. Úılerde kóbinese bul taqyrypqa múlde tyıym salynǵan. Sondyqtan balalarǵa erte bastan túsindirý jumystaryn júrgizý qajet», - deıdi Óskemen qalasynyń bas gınekology Marat Kóksegenov.