ShQO-da bıyl 560 myń sharshy metr turǵyn úı paıdalanýǵa berilmek
ÓSKEMEN. QazAqparat – Shyǵys Qazaqstan oblysynda bıyl 560 myń sharshy metr turǵyn úı paıdalanýǵa beriledi, dep habarlaıdy QazAqparat tilshisi.
Ótken jyly óńirde 520 myń sharshy metr turǵyn úı salynyp, paıdalanýǵa berildi. Bul kórsetkish qurylystyń aldyńǵy jyldaǵy qarqynynan 118%-ǵa artyq. 2021 jyly bul san taǵy da ulǵaıtylyp, 560 myń sharshy metr turǵyn úı paıdalanýǵa beriledi dep josparlanyp otyr. Bul týraly aımaq basshysy Danıal Ahmetov halyq aldynda esep berý barysynda aıtty.
«Turǵyn úı máselesi endi «Birqabatty Shyǵys» baǵdarlamasy aıasynda sheshiledi. Joba memlekettiń ınjenerlik-kommýnıkatsııalar júrgizýi esebinen jer úıler qurylysyn yntalandyrýǵa arnalǵan. Bıýdjet esebinen bólingen 29 mlrd teńge 642 myń sharshy metr turǵyn úı qurylysyn júrgizýge jáne jeke ınvestıtsııalardy tartýǵa múmkindik beredi», - dedi oblys ákimi.
Danıal Ahmetov óz orynbasary Baqytjan Baıahmetovke, qurylys basqarmasyna, qalalar men aýdandar ákimderine 30 áleýmettik jobany, onyń ishinde 13 sport nysanyn, 6 bilim berý nysanyn, 5 densaýlyq saqtaý obektisin paıdalanýǵa berýdi qamtamasyz etýdi tapsyrdy. Budan bólek, 4 mádenıet obektisi, atap aıtqanda Topqaıyń, Aınabulaq, Prırechnoe aýyldary men Áýezov kentindegi aýyldyq klýbtar qoldanysqa berilmek.
