ShQO-da bıyl 30 myńnan astam adam tumaý juqtyrǵan

ÓSKEMEN. QazAqparat – Shyǵys Qazaqstan oblysynda jyl basynan beri 30 myńnan astam adam JRVI-men aýyrǵan, dep habarlaıdy QazAqparat tilshisi.

ShQO Sanıtarlyq-epıdemıologııalyq baqylaý departamentiniń málimetine súıensek, óńir boıynsha bıyl 30 921 adam jiti rıspıratorlyq vırýstyq ınfektsııamen aýyrǵan. Bul kórsetkish ótken jylǵy kezeńmen salystyrǵanda 1,2 esege tómen. 14 jasqa deıingi balalar arasynda JRVI-ge shaldyqqandar sany 13 myńnan asady.

«2022 jyly oblys turǵyndary úshin tumaýǵa qarsy vaktsınanyń 75 myń dozasy satyp alyndy. Densaýlyq saqtaý jáne bilim berý nysandarynda JRVI jáne tumaý boıynsha 34 oqytý semınary ótkizildi», - deıdi departament basshysynyń mindetin atqarýshy Sáýle Slıamǵazına.

Vedomstvo ókilderiniń dereginshe, tumaý men COVID-19 ınfektsııasyna qarsy vaktsınany bir ýaqytta almaǵan durys. Vaktsınatsalar arasynda kem degende 2 apta bolýy kerek.