ShQO-da bıyl 23 dáriger Izraıl, Latvııa jáne Reseı klınıkalarynda biliktilik arttyrady
ShQO Densaýlyq saqtaý basqarmasynyń málimetine súıensek, Óskemende álemdik standarttarǵa sáıkes keletin biregeı gematologııa ortalyǵy salynyp jatyr. Onda dıagnostıkadan ońaltýǵa deıingi medıtsınalyq qyzmetterdiń tolyq spektri júrgiziledi.
«Budan bólek, búginde Rıdder qalasynda 140 tósektik statsıonary bar jáne kúnine 500 adamdy qabyldaıtyn emhana qurylysy bastaldy. Al Kúrshim aýdany Qaljyr aýylyndaǵy dárigerlik ambýlatorııa tolyqtaı salynyp bitti. Dárigerlerdiń biliktiligin arttyrýǵa da basa mán berilýde. 2022 jyly oblystyń 36 medıtsına qyzmetkeri onkogematologııa, gematologııa, anestezıologııalyq-reanımatologııa, kardıologııa, akýsherlik jáne gınekologııa boıynsha Izraıl, Reseı jáne Germanııanyń jetekshi klınıkalarynda oqyp keldi. Bıyl 23 dáriger Izraıl, Latvııa jáne Reseıdegi medıtsınalyq mekemelerde biliktilik arttyrady, - deıdi basqarma basshysynyń orynbasary Aınash Qapanova.
Onyń aıtýynsha, aýyl turǵyndaryna ýaqtyly skrınıngtik zertteýler júrgizý maqsatynda 7 jyljymaly medıtsınalyq keshen uıymdastyrylǵan. Ótken jyly 195 aýylda 45,7 myń adam tekserildi.
«Sońǵy bir jylda oblys boıynsha 305 medıtsınalyq jabdyq satyp alyndy. Onyń ishinde 8 rentgen apparaty, 2 flıýorograf, 3 mammograf, otorınolarıngologııalyq operatsııalarǵa arnalǵan mobıldi mıkroskop, aýdandyq aýrýhanalar men emhanalardyń perzenthana bólimshelerine arnalǵan jabdyqtar bar», - deıdi A.Qapanova