ShQO-da bıyl 21 myńnan astam búldirshin mektep tabaldyryǵyn attaıdy
ÓSKEMEN. QazAqparat - Shyǵys Qazaqstan oblysyndaǵy bilim berý uıymdary jańa oqý jylyna daıyn. Bul týraly aımaqtyq kommýnıkatsııalar qyzmetinde ótken brıfıngte jaýapty sala mamandary málim etti, dep habarlaıdy QazAqparat ShQO aqparattyq ortalyǵyna silteme jasap.
Brıfıng barysynda balalardy birinshi synypqa 6 jastan bastap qabyldaý týraly normanyń engizilýi týraly keńinen talqylandy. Brıfıng barysynda málim bolǵandaı, jańa oqý jylynan bastap birinshi synypqa 1 qyrkúıekke deıin 6 jasqa tolǵan balalar men aǵymdaǵy jyldyń sońyna deıin 6 jasqa tolatyn búldirshinder qabyldanady. Alaıda bul jaǵdaıda ata-ananyń pikiri de eskeriledi.
Aıta keteıik, 1 synyptyń tabaldyryǵyn attaıtyn balalarǵa bilim baǵdarlamasynyń sharty boıynsha árip oqytý, esep shyǵarý, jazý, sondaı-aq mátin oqý úıretiledi. Al mektepaldy daıarlyǵynan ótpegen balalar mektepterdegi daıarlyq kýrstaryna barady.
Aǵymdaǵy jyldyń 1 maýsymynan bastap oblystaǵy mektepterde 1 synypqa baratyn balalardyń qujattary elektrondy túrde qabyldanýda. Qyzmettiń túrin ata-analar elektrondyq tsıfrlyq qoltańba arqyly www.vko.ddo.kz saıtynan ala alady. Atalmysh joba ata-analar úshin tıimdi. Óıtkeni olar balasyn mektepke úıden shyqpaı-aq ornalastyra alady. Saıt arqyly ótinishterdi qabyldaý 1 shildeden 30 tamyzǵa deıin qabyldanady.
Brıfıng barysynda jańa mazmundaǵy bilim berý baǵdarlamasyna kóshý máselesi keńinen talqylandy. Aǵymdaǵy jyldyń birinshi qyrkúıeginen bastap 4,9,10 synyp oqýshylary osy baǵytta oqıtyn bolsa, 11 synyp oqýshylary kelesi jyldan bastap bul baǵdarlamaǵa qosylmaq. Sóıtip, kelesi jyly barlyq mektep jańartylǵan mazmundaǵy bilim berý baǵdarlamasyna kóshedi.
- Bıyl oqýshylardy oqýlyqtar men oqý-ádistemelik quraldarymen qamtamasyz etý maqsatynda oblystyq bıýdjetten 2 mlrd 383 mln teńge bólindi. Josparǵa sáıkes óńirdegi mektepterde bilim alyp jatqan barlyq oqýshy jańa oqý jylynyń basynda oqýlyqtarmen qamtamasyz etiledi, - dedi Shyǵys Qazaqstan oblysy ákiminiń orynbasary Ásem Núsipova.
Brıfıngte oqýshylar planshetter men elektrondy oqýlyqtardy paıdalana ala ma? degen saýal qoıyldy. Oǵan jaýapty sala mamandary árbir oqýshyda qaǵaz oqýlyqtary mindetti túrde bolýy tıis dep jaýap berdi. Biraq sabaq barysynda elektrondy oqýlyqtardy da paıdalanýǵa ruqsat beriledi eken. Degenmen bul másele Bilim jáne ǵylym mınıstrliginiń quziretinde ekenin atap ótken oryndy.
1 tamyzdan 30 qyrkúıekke deıin «Mektepke jol» respýblıkalyq qaıyrymdylyq aktsııasy uıymdastyrylady. Osy oraı atalmysh aktsııa bıyldan bastap aǵymdaǵy jyl sońyna deıin ótetinin aıta ketken oryndy. Aktsııa aıasynda az qamtylǵan jáne kópbalaly otbasylaryndaǵy 33000 myńnan astam balany qoldaý josparlanyp otyr, bul maqsatta jalpyǵa mindetti oqý qorynan 2 mlrd teńge bólinedi.
Búginde bizdiń oblysta bıýdjet qarjysynan tys demeýshiler men metsenattar 14 343 balaǵa 157 mln teńge kóleminde kómek kórsetti.
Óńirdegi áleýmettik jaǵynan az qamtylǵan jáne kópbalaly otbasylarda tárbıelenip jatqan balalar tegin mektep formasymen jáne ystyq tamaqpen qamtamasyz etiledi.
Óńirde Shyǵys Qazaqstan oblysynyń ákimi Danıal Ahmetovtiń bastamasymen «Meniń mektebim» jobasy júzege asyrylýda. Mundaǵy basty maqsat - aımaqtaǵy jaratylystaný pánderi boıynsha zamanaýı materıaldyq bazany qurý jáne oqý úrdisine ІT tehnologııalaryn engizý.
Ásem Núsipovanyń aıtýynsha, atalmysh joba aıasynda eki jyldyń ishinde óńirdegi 655 mektepte ІT synyptary ashylǵan. Bıyl 378 ІT synyby qoldanysqa berildi. Oǵan oblystyq bıýdjetten 899 mln teńge jumsalǵan.
Oqýshylar ІT baǵdarlamalardy meńgerýi úshin Semeı qalasyndaǵy Elektrotehnıkalyq kolledji men Óskemen qalasyndaǵy Polıtehnıkalyq kolledji bazasynda 3-11 synyptarda sabaq beretin oqytýshylardy ІT baǵdarlamalary boıynsha oqytý uıymdastyryldy. Eki jyl ishinde 1127 muǵalim kýrstyq daıarlyqtan ótti. Onyń ishinde 2019 jyly shaǵyn jınaqtalǵan mektepterden kelgen 573 muǵalim bar.
Oblysta 2016 jyldan bastap úshtildik bilim berý baǵdarlamasy júzege asyrylýda. Joba aıasynda kúni búginge deıin 8 myńnan astam oqytýshy bilimin jetildirdi. Onyń ishinde 500 fızıka, bıologııa, hımııa, ınformatıka pánderiniń muǵalimderi bar.
Oblystaǵy 11 mektepte aǵylshyn tilinen bólek, frantsýz tilin de oqytý qolǵa alynady. Búgingi kúnge 200 oqýshy frantsýz tilinde bilim alyp jatsa, 2019 jylǵy 1 qyrkúıekten bastap olardyń sany 1000 balaǵa jetedi dep kútilýde.
Jańa oqý jylynda oblystaǵy 655 mektepte 193 myńnan astam oqýshy bilim alady. Al birinshi synypqa 21 myńnan astam búldirshin qabyldanady.
Aǵymdaǵy jyly alǵashqy qońyraý kúni jeksenbi kúnimen tuspa-tus kelip tursa da, saltanatty shara ótetin bolady. Al mektep oqýshylary men kolledj stýdentteri 2 qyrkúıekten bastap oqýǵa kirise alady.
Aıta keteıik, óńirimizde respýblıkalyq bıýdjet esebinen 2600 oryndyq úsh mektep salynýda. Onyń ishinde, ekeýi oblys ortalyǵynda boı kóterse, bireýi Tarbaǵataı aýdanynda (Aqjar aýyly) ashylady.
Óskemen qalasynda paıdalanýǵa beriletin eki mekteptiń biri 1 qyrkúıekte, qalǵan eki mektep aǵymdaǵy jyldyń qazan aıynda ashylady.
