ShQO-da bıyl 2 myńǵa jýyq adam bıznesti onlaın tirkedi
«Azamattarǵa arnalǵan úkimet» memlekettik korporatsııasy Shyǵys Qazaqstan oblystyq fılıaly dırektorynyń orynbasary Merýert Tarybaeva zańdy tulǵalardy memlekettik tirkeýdi qalaı onlaın júrgizýge bolatyndyǵyn aıtty. Bul Qazaqstandaǵy eń kóp talap etiletin memlekettik qyzmetterdiń biri.
«Tirkeýdi shyǵynsyz ári jedel jasaý úshin zańdy tulǵaǵa HQO-ǵa júginýdiń qajeti joq. Ásirese, shaǵyn jáne orta bıznes sýbektilerin tirkeýge, kommertsııalyq zańdy tulǵalardy qaıta tirkeýge nemese taratýǵa qatysty qyzmetter bolsa, osynyń barlyǵyn eGov portaly arqyly jasaýǵa bolady. Elektrondy ótinishti toltyrý jetkilikti. Bir kún ishinde tirkeýshiniń jeke kabınetine memlekettik tirkeý týraly elektrondy anyqtama nemese bas tartý túrinde jaýap jiberiledi. Qajet bolǵan jaǵdaıda bıznesti tirkeý týraly kýálikti basyp shyǵarýǵa bolady», - dedi ol.
Bıznesti tirkeý protsedýrasyn jedeldetý memlekettik qyzmetterdi avtomattandyrý jáne ońtaılandyrý úderisiniń arqasynda múmkin bolyp otyr. Eger buryn ótinish berýshi memlekettik organǵa 5 jáne odan da kóp qujatpen kelip, tirkeýdi alý úshin derekterdi tekserýdi 5 kúnge deıin kútetin bolsa, búginde elektrondy túrde barlyq rásim bir kúnnen aspaıdy jáne eshqandaı qujat talap etpeıdi.
«Sonymen qatar zańdy tulǵanyń basshysyn aýystyrý eń keń taralǵan qyzmet túriniń biri. Qazirgi ýaqytta eGov.kz elektrondy úkimet portaly arqyly zańdy tulǵanyń basshysyn aýystyrý qyzmeti iske qosyldy. Jalpy jyl basynan beri oblys boıynsha 2000-ǵa jýyq adam bıznesti onlaın tirkedi», - dedi Merýert Tarybaeva.