ShQO-da bıyl 12 myńnan astam otbasy memlekettik járdemaqy alady

ÓSKEMEN. QazAqparat - 2020 jyly Shyǵys Qazaqstan oblysynda tabysynan bólek, bala sanyna qaraı belgilengen memlekettik járdemaqydan 12 525 kópbalaly otbasy úmitti bolyp otyr, dep habarlaıdy QazAqparat tilshisi.

Aıta ketsek, 2020 jyldan bastap kámelettik jasqa tolmaǵan 4 nemese odan da kóp balasy nemese 23 jasqa deıingi kúndizgi bólimde oqıtyn stýdentteri bar otbasylarǵa memlekettik járdemaqy taǵaıyndaldy. Jańa járdemaqy otbasynyń tabysyna emes, tárbıelep otyrǵan balalarynyń sanyna qaraı 4 balaǵa – 42 496 teńge, 5 balaǵa – 53 127 teńge, 6 balaǵa – 63 757 teńge, 7 jáne odan da kóp balaǵa 74 388 teńgeden tólenedi.

«Shyǵys Qazaqstanda aldyn ala jasalǵan esepteý boıynsha 12 525 otbasyǵa memlekettik járdemaqy taǵaıyndalmaq. Óńirde tórt bala tárbıelep otyrǵan 8 myńnan astam, bes balaly 3 myńǵa jýyq, alty balaly myńnan astam otbasy tirkelgen. Al 7 balasy bar januıa sany 300-ge jetedi», – dep habarlady ShQO Jumyspen qamtý jáne áleýmettik baǵdarlamalardy úılestirý basqarmasynyń baspasóz hatshysy Janar Asylhanova.

Eske sala ketsek, jyl basynda QR Prezıdenti Ákimshiligi qoǵamdyq qabyldaýynyń Telegram paraqshasy 2020 jyldyń 1 qańtarynan bastap qoldanysqa engizilgen áleýmettik saladaǵy keıbir ózgeristerdi túsindirgen bolatyn.