ShQO-da birneshe tonna kúkirt qyshqyly tógildi

ÓSKEMEN. QazAqparat – Kúrshim aýdanynda, Aqbulaq jáne Egindibulaq aýyldary arasynda qyshqyl quıylǵan júk kóligi aýdaryldy, dep habarlaıdy QazAqparat YK-news.kz-ke silteme jasap.

Aımaqtyq kommýnıkatsııalar qyzmetiniń deregi boıynsha, kólik apatqa ushyraýy saldarynan 20 tonna kúkirt qyshqyly tógilgen.

ShQO Sanıtarııa-epıdemıologııalyq baqylaý departamenti oqıǵa ornynan lastanǵan topyraq alynyp tastalatynyn habarlady.

Jaqyn mańdaǵy bulaq shamamen bes shaqyrym jerde ornalasqan.

Ákimdiktiń sózinshe, jergilikti turǵyndar bulaqty paıdalanbaıdy. Soǵan qaramastan mamandar qyshqyl tógilýi saldarynan bulaqtyń lastanǵan álde lastanbaǵanyn anyqtaý úshin sýdan synama aldy.