ShQO-da birqatar jol jabyldy
ÓSKEMEN. QazAqparat - Jaısyz aýa raıyna baılanysty óńirde birqatar jol jabyldy, dep habarlaıdy QazAqparat TJK-ǵa silteme jasap.
«Qazaqavtojol» kompanııasynyń málimetinshe, 30 jeltoqsan kúni saǵat 16:30-dan bastap aýa raıynyń qolaısyzdyǵyna baılanysty ShQO-da «Omby-Maıqapshaǵaı» respýblıkalyq mańyzy bar joldyń 756-906 shaqyrymy, Semeı qalasynan Qalbataý kentine deıingi aralyǵynda barlyq kólik túrlerine qozǵalys toqtatylǵan.
Sonymen qatar, saǵat 18:00-de «Almaty-Óskemen» jolynyń 977-1 068 shaqyrymy, Qalbataý kentinen Qasym Qaısenov aýyly aralyǵynda barlyq kólik túrleriniń qozǵalysy toqtatyldy. Joldyń jabylýyna burqasyn, aınalanyń kórinbeýi sebepshi bolǵan.
Osınovskıı asýyndaǵy qaýipsizdikti saqtaý úshin «Óskemen-Altaı-Raqman qaınarlary» joly tirkemesi bar júk kólikterine jabyldy. Bul joldyń 46-66 shaqyrymy, Severnoe aýyly men Serebrıansk qalasynyń aralyǵy.
