ShQO-da bir jylda 100-den astam kólik órtendi
ShQO tótenshe jaǵdaılar departamenti baspasóz qyzmetiniń málimetine súıensek, 2022 jyly óńir boıynsha 100-den astam kólik otqa oranǵan. Osy jyldyń basynan beri úsh avtokólik órtendi.
«Kólik órtteriniń 90%-y elektr symdarynyń qysqa tuıyqtalýynan shyqqan. Sondaı-aq elektr jabdyqtarynyń jaǵdaıyna baılanysty, kólikke quıylatyn suıyqtyqtardyń áserinen jalyn shyǵyp jatady. Kún saıyn avtokóliktiń bólshekterin, ásirese qozǵaltqysh bóligin muqııat tekserip turý kerek», - delingen aqparatta.
Eger bir jerden azdap maı aǵyp ketse, janarmaıdyń ıisi sezilse, bul maı nemese otyn qubyrynyń zaqymdanǵanynyń belgisi bolýy múmkin.
Budan bólek, avtokólik dóńgeleginiń dıskisine nemese korpýsyna arnaıy jaryqtandyrǵyshty, sándi qosymsha elektr jabdyqtaryn, ár túrli antıradarlar ornatý – kólik órtenýine ákelip soǵýy yqtımal.