ShQO-da bir úıdiń 70 qoıyn qasqyr tartyp ketti
ÓSKEMEN. QazAqparat – Shyǵys Qazaqstanda qoraǵa qasqyr túsip, 70 qoıdy tartyp ketti, dep habarlaıdy QazAqparat.
Bul jaǵdaı Tarbaǵataı aýdany Ahmet-Bulaq aýylynda boldy.
«Men qoıdy ózim jeke baǵamyn. Keshke óristen keıin qoraǵa qamaǵanmyn. Tańerteń kelgenimde maldyń jaırap jatqanyn kórdim. Aman qalǵandary burysh-buryshqa tyǵylysyp tur. Oılap qarasańyz, 70 bas degen eki úıdiń qoıy ǵoı. Basymyzda nesıe bar, qaladaǵy balanyń oqýynyń qarajaty bar, olardy osy qoıdy satyp tóleıtin edik», – deıdi Nazar Sadýaqasov.
Oıda-joqta oısyraı shyǵyndalǵan malshynyń sanasynda suraq pen úreı bar. Suraǵy: Memleketten ótemaqy bola ma? Úreıi: ıt-qus kún sanap kóbeıip keledi. Bara-bara adamǵa shaýyp júrmeı me? Al myltyqty ruqsat qaǵaz bolsa da ustatpaıdy.
«Psıhologııalyq bolsyn, zańdyq bolsyn, barlyq tekserýden ótip, myltyqqa ruqsat aldyq. Alaıda qarýymyz seıfte bosqa tur. Ustatpaıdy. Nege ekeni túsiniksiz. Jyl saıyn merzimin uzartý úshin aqshasyn tekke tólep otyrmyz. Qasqyr bolsa kóbeıip keledi», – deıdi turǵyn.
Al aýyl ákiminiń aıtýynsha, mal jekemenshik bolǵandyqtan memleketten ótemaqy tólenbeıdi.
«Mal ıesimen kezdesip, mán-jaıdy kózben kórdim. Qorasy aýyldyń joǵary jaǵynda, endi basqa malyn aman saqtaý úshin túnde kúzetý keregin aıttyq. Aýdannan qasqyrdy atqyzý úshin ańshylardy shaqyrtyp qoıdyq. Mal jekemenshik bolǵandyqtan memleketten ótemaqy tólenbeıdi. Iá, saqtandyrý júıesi bolsa jaqsy-aq edi. Qazir halyq tym qurysa myltyq ustaýǵa ruqsat surap otyr. Sebebi jyrtqysh kóbeıip ketti. Ony qoıyp jazda, aıý da túsken bolatyn», – deıdi Ahmet-Bulaq aýylynyń ákimi Dáýitbek Nııazbekov.
Polıtsııa osy oqıǵaǵa qatysty keıin túsinikteme beretindigin habarlady.
Esentaı Aıtuly
