ShQO-da bir táýlik ishinde 4 dala órti tirkeldi
ÓSKEMEN. QazAqparat – Shyǵys Qazaqstan oblysynda bir táýlik ishinde 4 dala órti tirkeldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar Borodýlıha aýdany Proletarka aýylynda 40 gektar aýmaqqa jaıylǵan shóp órtin sóndirdi. Órtti sóndirýge jeke quramnan jáne jergilikti atqarýshy organnan 8 adam men 4 tehnıka jumyldyrylǵan.
«Oblys boıynsha ótken táýlikte 4 dala órti tirkeldi. Jalpy bıyl órt qaýpi joǵary kezeń bastalǵaly beri dalada 113 órt bolǵan. Qyzyl jalynnyń aýmaǵy 2501 gektarǵa jaıyldy», - dep habarlady vedomstvo ókilderi.
TJD mamandary orman jáne dala alqaptarynda órt qaýipsizdigin qamtamasyz etý maqsatynda turaqty túrde monıtorıng júrgizip jatyr. Qazirgi ýaqytta oblys boıynsha arnaıy jasaqtalǵan mobıldi toptar profılaktıkalyq reıdterge shyǵýda.
«Sonyń nátıjesinde órt qaýipsizdigi talaptaryn buzǵan 260 adam anyqtaldy. Olar ÁKQtK-niń 336 jáne 410-baptary boıynsha ákimshilik jaýapqa tartylǵan», - delingen aqparatta.
