ShQO-da bir ózi 400 jaý áskerin óltirgen mergenge eskertkish ornatylady
ÓSKEMEN. QazAqparat - Shyǵys Qazaqstannyń Jarma aýdanynda áıgili mergen Tóleýǵalı Ábdibekovke eskertkish ornatylady, dep habarlaıdy QazAqparat tilshisi.
Tóleýǵalı Ábdibekov 1916 jyly Jarma aýdanynda dúnıege kelgen. Jastaıynan ańshylyǵymen aty shyqqan ol 1942 jyly maıdanǵa aralasady. Sol jyldyń ózinde-aq onyń 219 jaý áskerin oqqa baılaǵany týraly tarıhı derek 8-shi gvardııalyq atqyshtar dıvızııasynyń áskerı esebinde saqtalǵan. 1944 jyldyń 22 aqpanynda ol sońǵy ret atysqa aralasady. Qarsy jaqtyń mergenimen uzaq ańdysý kezinde birinshi bolyp oqqa ilinedi. Qaısar er jaraly kúıinde qarsylasyna oq atyp, dál tıgizedi. Qos mergen osylaısha bir-birine ajal qushtyrǵan. Qazaq mergeni týraly sol kezde maıdan gazetteri jarysa jazdy. Tipti bir kúnde 122 jaý áskerin jaıratqany týraly aqparat sýretimen birge berilgen. Sóıtken batyr ózine laıyq qurmetke bólenbedi. Odaq batyry, «Halyq qaharmany» sııaqty ataqtar mergenge buıyrmady. Osy olqylyqtyń ornyn toltyrý úshin jarmalyq jerlesteri batyrdyń eskertkishin aýdan ortalyǵy Qalbataý aýylyna ornatpaqshy. Ol úshin jergilikti kásipkerler 5,5 mln teńge bólýge daıyn.
«Eskertkishtiń bıiktigi men qandaı materıaldan daıyndalatyny áli belgisiz. Kúzge deıin Qalbataýdyń Dostyq kóshesine ornatsaq degen jospar bar. Batyrdyń atqan oǵy qıys ketpegen mergen bolǵanyn kónekózder bertinge deıin aıtyp otyratyn. Ekinshi dúnıejúzilik soǵys kezinde 397 jaý áskerin óltirse de, laıyqty qurmet kórsetilmedi. Keıin de aty kitaptarǵa engeni bolmasa, resmı ataq berilgen joq. Endi tym bolmasa, týǵan jerinde eńseli eskertkishi turý kerek degen usynys aıtyldy. Ony jergilikti kásipkerler de qoldap áketti» - deıdi aýdan ákiminiń orynbasary Aıdar Ibraev.
