ShQO-da bir kúnde jaýǵan qardyń qalyńdyǵy jarty metrden asty
Shyǵys Qazaqstanda 13 jeltoqsanda kúni boıy tolassyz qar jaýdy. Onyń ishinde Óskemende de tańerteń bastalǵan qar tún ortasyna deıin jaýǵan.
Qalada kólikter aýlalarynan shyǵa almaı, avtobýstar kesteden keshikti. Jaýǵan qar qalyńdyǵy jarty metrden asqan.
«Qazgıdromet» RMK Shyǵys Qazaqstan oblysy fılıalynyń dırektory Lıazzat Bolathanqyzynyń aıtýynsha, eń qalyń qar Marqakól qoryǵy mańynda túsken - 75 santımetr.
Kúrshim aýdanyna qarasty Boran aýylynda 56, Terektide 49 santımetrge jetken. Samar aýdanyna qarasty aýyldarda - 34-40 santımetr aralyǵynda. Altaı qalasynda 56, Katonqaraǵaı aýdanyndaǵy Úlken Naryn aýylynda 40 santımetr jaýǵan.
«Óskemende kommýnaldyq qyzmetter táýlik boıy kúsheıtilgen rejımde jumys istedi. Tańerteń qaladaǵy barlyq tasjol ashyq boldy. Qardy tazalaýǵa 86 arnaıy tehnıka men 185 jumysshy jumyldyrylǵan», - deıdi qala ákiminiń orynbasary Denıs Fedchenko.