ShQO-da bir kúnde tótenshe jaǵdaı rejımin buzǵan 7 kásipker anyqtaldy
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri tótenshe jaǵdaı rejımin buzǵan kásipkerlerdi jaýapqa tartýda, dep habarlaıdy QazAqparat.
ShQO polıtsııa departamenti baspasóz qyzmetiniń málimetine súıensek, Óskemen qalasyndaǵy loýndj-bar ıesi zańmen bekitilgen shekteýlerge qaramastan saǵat 22.00-den keıin jumysyn jalǵastyra bergen. Er adam ákimshilik jaýapkershilikke tartylyp, 15 kúnge qamaýǵa alyndy. Budan bólek, Semeıdegi qoǵamdyq tamaqtaný oryndaryn jalǵa alǵan eki kásipker 5 kúnge qamalǵan.
«Kún saıyn tártip saqshylary ákimdikpen jáne óńirdegi taýarlar men kórsetiletin qyzmetterdiń sapasy men qaýipsizdigin baqylaý departamentiniń mamandarymen birlesip reıd júrgizýde. 31 naýryz kúni TJ rejımin buzǵan 7 kásipker anyqtalǵan», - dep habarlady vedomstvo ókilderi.
Esterińizge sala ketsek, Qazaqstanda 16 naýryz ben 15 sáýir aralyǵynda tótenshe jaǵdaı jarııalanǵan bolatyn.
