ShQO-da bir kúnde 9 júrgizýshi mas kúıinde rýlge otyrǵan
ÓSKEMEN. QazAqparat - Shyǵys Qazaqstan oblysynda 1 kúni ishinde mas kúıde kólik tizgindegen 9 júrgizýshi anyqtaldy, dep habarlaıdy QazAqparat.
2020 jylǵy 13 aqpanda túngi saǵat 03.00 shamasynda tártip saqshylary Glýbokoe aýdanyndaǵy «Óskemen-Altaı» tasjolynda «VAZ 2107» markaly avtokólikti toqtatqan. Polıtseıler birden 44 jastaǵy júrgizýshiden alkogoldi ishimdiktiń ıisin sezedi. Oblys ortalyǵynyń turǵyny medıtsınalyq tekseriske jiberilgennen keıin onyń ortasha deńgeıde mas bolǵany anyqtalǵan.
Qazirgi ýaqytta Glýbokoe aýdandyq sotynyń úkimimen jeti jylǵa kólik quralyn júrgizý quqyǵynan aıyrylǵan aıyptalýshy 15 táýlikke ákimshilik qamaýǵa alyndy. Al kóligi aıyppul turaǵyna qoıylǵan.
ShQO Polıtsııa departamenti baspasóz qyzmetiniń habarlaýynsha, búginde óńir boıynsha «Qaýipsiz jol» jedel aldyn alý sharasy júrgizilýde. Alǵashqy kúnniń ózinde bekitilgen jyldamdyqty asyrǵan 50 júrgizýshi, qarsy baǵytqa shyǵyp ketken 5 avtokólik, osyǵan deıin kólik júrgizý quqyǵynan aıyrylsa da rýlge otyrǵan 5 jáne mas kúıde kólik tizgindegen 9 adam anyqtaldy. Sondaı-aq qaýipsizdik beldigin taqpaǵany úshin 180 júrgizýshi, jol erejesin buzǵany úshin 180-nen astam jaıaý júrginshi ákimshilik jaýapqa tartylǵan.
«Aıyppul turaǵyna 9 kólik qoıylǵan. Joldardyń qaýipti ýchaskelerinde 190-nan astam kólik patrýlderi uıymdastyryldy. Bul baǵyttaǵy jumystar aldaǵy ýaqytta da jalǵasyn tappaq», - delingen vedomstvo málimetinde.
