ShQO-da bir kúnde 7 órt sóndirildi
ÓSKEMEN. QazAqparat –Shyǵys Qazaqstan oblysynda bir kúnniń ishinde 7 órt sóndirildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 24 jeltoqsanda saǵat 18.52-de Zýbovsk aýylyndaǵy Prıvokzalnaıa kóshesinde jer úıdiń aýlasyndaǵy garajda órt shyqqan. Oqıǵa ornyna kelip jetken órt sóndirýshiler jalpy aýdany 18 sharshy metrge jetken tilsiz jaýdy aýyzdyqtady. Jalynnyń shyǵý sebebi – elektr jabdyqtaryn montajdaý jáne paıdalaný kezinde órt qaýipsizdigi talaptarynyń saqtalmaýynan bolýy múmkin.
Sol kúni saǵat 20.00-shamasynda Tarbaǵataı aýdany Quıǵan aýylyndaǵy jer úı tóbesiniń aǵash qurylymdary, qabyrǵasy, jıhaz ben jeke zattar órtengen. Ottyń jalpy aýmaǵy 80 sharshy metrdi qurady.
Saǵat 22.23-te Altaı qalasynda jeke turǵyn úı mańyndaǵy sharýashylyq qora-jaılarda órt shyqqan. Osynyń saldarynan 4 tonna shóp janyp ketti. Órttiń shyǵý sebebi – otpen abaısyz áreket etýden nemese qasaqana órteýden bolýy yqtımal. Al Katonqaraǵaı aýdanynda bolǵan monshadaǵy órttiń aýmaǵy – 15 sharshy metr.
Budan bólek, Óskemendegi Sogrınskaıa kóshesindegi jer úı shatyrynyń aǵash qurylymdaryn, qorany jáne kórshi úıdiń jazǵy asúıin jalyn sharpyǵan. 100 sharshy metrge taraǵan tilsiz jaýdy aýyzdyqtaýǵa 1 saǵatqa jýyq ýaqyt ketti. Órttiń shyǵýyna otpen abaısyz áreket etý sebep bolýy yqtımal. Sondaı-aq órt sóndirýshiler Semeı qalasyndaǵy jer úıdegi qyzyl jalyndy óshirdi. Aldyn ala málimet boıynsha, órttiń shyǵýyna peshti paıdalaný kezindegi órt qaýipsizdigi talaptarynyń saqtalmaýy sebep bolǵan.
