ShQO-da bir kúnde 5 órt sóndirildi
ShQO Tótenshe jaǵdaılar departamenti baspasóz qyzmetiniń málimetine súıensek, 13 qańtar kúni Tarbaǵataı aýdanyndaǵy JShS-niń biriniń aýmaǵynda ornalasqan garajdyń shatyry janǵan. Tilsiz jaý 2021 jylǵy «T-170» traktoryn da sharpyǵan. Oqıǵa ornyna kelip jetken qutqarýshylar jalpy aýdany 100 sharshy metrge jetken jalyndy sóndirdi.
«Osy kúni Glýbokoe aýdany Tarhanka aýylynda jeke turǵyn úıden órt shyqqan. Ot qabyrǵany, edendi, tereze jáne esik bloktaryn, shatyrdy, jıhaz ben jeke zattardy sharpydy. Aldyn ala málimet boıynsha órttiń shyǵý sebebi – pesh ornatý jáne paıdalaný kezinde qaýipsizdik talaptaryn saqtamaý bolyp otyr», - delingen aqparatta.
Altaı aýdany Jańa Buqtyrma kentinde jer úıde órt boldy. Sol jerge shuǵyl kelgen órt sóndirýshiler qyzyl jalyndy tolyqtaı sóndirdi.
«Kúrshim aýdany Topterek aýylyndaǵy jeke turǵyn úıdiń shatyry, edenniń aǵash qurylymdary, jıhaz jáne jeke zattar janǵan. Órttiń shyǵýyna – pesh paıdalaný kezinde qaýipsizdik talaptarynyń saqtalmaýy sebep bolýy múmkin. Sondaı-aq Shemonaıha qalasy Vostochnyı kóshesinde ornalasqan garajdan órt shyqty. Oqıǵa ornyna jeke quramnan 8 adam jáne 2 tehnıka jumyldyrylyp, kóp uzamaı otty óshirdi», - delingen habarlamada.
