ShQO-da bir ǵasyrdan astam tarıhy bar meshit qulaýdyń aldynda tur
ASTANA. QazAqparat - Shyǵys Qazaqstan oblysynyń Aqkól aýylyndaǵy bir ǵasyrdan astam tarıhy bar sáýlet eskertkishi qıraý aldynda tur. Onyń ereksheligi, aǵashtan salynǵan ǵımaratta birde-bir shege qoldanylmaǵan, dep habarlaıdy «Habar 24».
Kezinde meshit bolǵan nysan, biraz jyldan beri apatty jaǵdaıda tur. Іrgetasy jermen jeksen bolyp, aǵash beldikteri ábden shirip ketken.
Aqkól aýylynda qazir birneshe úı ǵana qalǵan. Solardyń birinde zeınetker Gúlshıra ájeı turady. Biraq ol kisi kóshpeıtinin aıtady. Sebebi meshit ǵımaratyn qaraýsyz qaldyryp ketkisi kelmeıdi.
«Tóbesiniń qańyltyry ushyp ketti. Munaralary áli qulamaıdy», - deıdi Gúlshıra Saparıeva.
Bul meshitti osydan 111 jyl buryn jergilikti Sultan Fazylbekov esimdi azamat salǵan eken. Ǵımarattyń qurylys jumystaryna Bashqurtstannyń eń myqty degen sáýletshilerin jumyldyrypty. Al qurylys materıaldary búkil Ertis jaǵasyndaǵy eldi mekenderden jetkizilgen kórinedi. Ǵımarat meshit retinde 10 jyl ǵana paıdalanylǵan. Keıinnen Keńes úkimetiniń tusynda munda bastaýysh mektep bolǵan. Aýyl turǵyny Málıka Naýryzbaevanyń aıtýynsha, bul ǵımaratty qaıtadan qalypqa keltirse, aýyl da ajarlana túsedi.
«Bul jerden tasjol ótip jatyr. Tipti keıbir jolaýshylar osynda toqtap, ǵımaratqa tamsanyp qarap ketedi. ıAǵnı halyq qyzyǵady degen sóz. Demek bul jerde týrızmdi de damytýǵa bolady», - deıdi aýyldyq okrýgtiń qoǵamdyq medıatory Málıka Naýryzbaeva.
Bıyl jazda bul ǵımaratqa oblystyq tarıhı-mádenı murany qorǵaý ortalyǵynyń mamandary da qyzyǵýshylyq tanytypty. Nysandy jan-jaqty zerttegen olar, munda «Rýhanı jańǵyrý» baǵdarlamasynyń aıasynda jóndeý jumystaryn júrgizetin bolyp sheshken.
«Aqkól meshiti búgingi kúni qatań baqylaýda tur. Osy maýsym aıynda oblystyq mádenıet basqarmasynan jumys toby kelip, zerttep ketken bolatyn. Meshit jóndeýden ótkiziledi. Biraq qashan, qaı ýaqyttarda bolatyny belgisiz. Ony sol jumys toby sheshetin bolady», - deıdi Besqaraǵaı aýdany ákiminiń orynbasary Baýyrjan Batalov.
Meshitti qalpynda saqtap qalýdy mamandar buryn da qolǵa alǵan eken. Alaıda ony oblys ortalyǵyna aparyp qoımaq bolǵan. Biraq buǵan jergilikti turǵyndar qarsy bolypty. Endi aldaǵy ýaqytta atalǵan ǵımarat Aqkól aýylynyń sánine aınalady degen senim mol.
