ShQO-da bir aıda pesh jaqqanda qaýipsizdik erejelerin saqtamaýdan 16 órt shyqty
ShQO tótenshe jaǵdaılar departamenti baspasóz qyzmetiniń málimetine súıensek, qutqarýshylar 2023 jyldyń birinshi aıynda bolǵan órtterge qatysty taldaý júrgizdi.
Sonyń nátıjesinde, pesh jaqqan kezde qaýipsizdik erejelerin saqtamaý saldarynan - 16, elektr jabdyqtaryn paıdalanǵan kezdegi qaýipsizdik talaptaryn buzýdan - 15, otty abaısyz paıdalanýdan - 9 órt shyqqandyǵy anyqtaldy.
«Sońǵy órtterdiń biri Katonqaraǵaı aýdanynyń ortalyǵyndaǵy Amangeldi kóshesinde bolǵan. Turǵyn úıdiń aǵash shatyry, tóbesi, edeni, ishtegi jıhaz ben jeke zattar jandy. Órt sóndirýshiler jalpy aýdany 60 sharshy metrge jaıylǵan tilsiz jaýdy aýyzdyqtady. Belgili bolǵandaı, jalynnyń shyǵý sebebi - peshtegi aqaý», - delingen aqparatta.
Osy rette, qutqarýshylar turǵyndardy barynsha abaı bolýǵa, órt qaýipsizdigi erejelerin qatań saqtaýǵa shaqyrdy.