ShQO-da bir aptada 61 adam kólikti mas kúıde aıdaǵan
ÓSKEMEN. QazAqparat – Shyǵys Qazaqstan oblysynda 12-18 naýryz aralyǵynda ótken «Quqyqtyq tártip» jedel aldyn alý sharasynyń qorytyndysy shyǵaryldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 7 kúnde polıtsııa qyzmetkerleri izin sýytpaı 198 qylmysty, buryn jasalǵan 90 qylmysty ashyp, izdeýde júrgen 21 kúdiktini qolǵa túsirgen.
Shara barysynda 10 myńnan astam ákimshilik quqyq buzýshylyq faktisi anyqtaldy. Onyń ishinde usaq buzaqylyq – 1292, qoǵamdyq oryndarǵa mas kúıde kelý – 1 608, úıde tirkeýsiz nemese jeke basyn kýálandyratyn qujatsyz turǵany úshin 1292 adam jaýapqa tartyldy.
«7 kún ishinde kólik quralyn mas kúıde basqarǵan 61 júrgizýshi ustaldy. Sondaı-aq kólik júrgizý quqyǵynan aıyrylsa da rýlge otyrǵan 3 adam jaýapqa tartylǵan. Іshki ister organdarynda profılaktıkalyq esepte turǵan 9 000-nan astam azamat turǵylyqty jeri boıynsha tekserildi», - dedi ShQO PD jergilikti polıtsııa qyzmetiniń bastyǵy Talǵat Nurıev.
Budan bólek, oblys polıtseıleri esirtki zattaryn saqtaýdyń 18 faktisin anyqtaǵan. Marıhýananyń 135-ke jýyq birrettik dozasy tárkilendi.
