ShQO-da «BIPEK AVTO» kompanııasynan tárkilengen shıpajaı aýktsıonda satyldy

ÓSKEMEN. KAZINFORM - Shyǵys Qazaqstan oblysyndaǵy «Rahman qaınarlary» shıpajaıyna aýktsıon elektrondy saýda alańynyń saıtynda ótkizildi. Saýyqtyrý kesheniniń burynǵy ıesi alaıaqtyq jasady dep aıyptalǵan «BIPEK AVTO» avtoholdınginiń basshysy Anatolıı Balýshkın bolǵan.

Shıpajaıdyń ózi Óskemen qalasynan 450 shaqyrym jerdegi Katonqaraǵaı aýdanynda, Altaı taýlarynyń ortalyǵynda teńiz deńgeıinen 1760 metr bıiktikte ornalasqan. Jalpy aýdany 7091,3 sharshy metrdi alyp jatyr. Búkil keshenniń naryqtyq quny 1,6 mlrd teńge.

«Rahman qaınarlary» shıpajaıy 1964 jyly ashylǵan. Kelýshilerdi mıneraldy sýmen emdeıdi. Keshen aýmaǵynda 15 adamǵa arnalǵan standartty eki qabatty kottedjder, 1-3 adamǵa arnalǵan bir qabatty «jartylaı lıýks» 5 kottedj, eki medıtsınalyq keshen, terrassasy bar meıramhana, monsha, naýbaıhana, kir jýatyn bólme, janarmaı quıý stantsııasy jáne meshit bar.

Aıta keteıik, shıpajaı 2021 jyldan beri jumys istemeı tur.

Eske salsaq, osyǵan deıin Óskemende Anatolıı Balýshkınge qatysty sot isi bastalǵany habarlanǵan bolatyn.