ShQO-da bıyl jazda 23 jaǵajaı jumys isteıdi
ÓSKEMEN. KAZINFORM – Shyǵys Qazaqstan oblysynda shomylý maýsymyna oraı sý jaǵasyndaǵy 23 resmı demalys aımaǵy daıyndalyp jatyr, dep habarlaıdy Kazinform agenttiginiń tilshisi.
Qazir qutqarýshylar sý túbin tekserip, jaǵajaılardy qarap shyǵyp, qaýipsizdik sharalaryn kúsheıtip jatyr. Myńǵa jýyq kóli men 800-den astam ózeni bar óńir úshin jaz mezgilinde qaýipsiz demalysty uıymdastyrý eń kúrdeli mindetterdiń biri sanalady. Ásirese jyl saıyn sý jaǵasynda demalýshylar sanynyń artýy jaǵdaıdy qıyndatyp otyr.
Bıyl resmı shomylý oryndary oblystyń barlyq derlik aýdanynda ashylady. Eń kóp jaǵajaı Ulan aýdanynda bolady. Munda birden segiz ýchaske daıyndalady.
– Oblys ákimdigi qaýlysyna sáıkes óńirde sý aıdyndarynda jappaı demalý, týrızm jáne sport úshin 23 ýchaske belgilendi. Óskemende úsh resmı jaǵajaı bolady, Ulan aýdanynda – 8, Samar jáne Kúrshim aýdandarynda – ekeýden, qalǵan aýdandarda bir-birden bolady, – dedi ShQO TJD tótenshe jaǵdaılardy joıý basqarmasynyń basshysy Eldar Shaımardanov.
Oblys ortalyǵynda Levobereje saıabaǵynda, «Samal» saıabaǵynda jáne Beırýdalyq emes materıaldar kombınaty aýdanynda resmı jaǵajaılar jumys isteıdi. Qazir onda maýsymnyń ashylýyna daıyndyq aıaqtalyp jatyr.
Jumys bastalar aldynda barlyq demalys aımaqtary mindetti tekseristen ótedi. Mamandar sý túbin zerttep, qutqarý beketteriniń, býılardyń, medıtsınalyq pýnkitterdiń jáne eskertý belgileriniń bar-joǵyn tekseredi.
– Qazirgi tańda TJD-ǵa nysandardyń túbin tekserý úshin súńgýirlik jumystar júrgizýge 16 ótinim kelip tústi. Tekserý aıaqtalǵannan keıin ǵana daıyndyq aktisi beriledi, – dep atap ótti vedomstvoda.
Bıyl balalar qaýipsizdigine erekshe nazar aýdarylyp otyr. Qutqarýshylardyń aıtýynsha, jabdyqtalǵan jaǵajaıdyń ózi eresekter qyraǵylyq tanytpasa, qaýiptiń aldyn tolyq ala almaıdy.
– Ata-analar balalaryn bir mınýtqa da qaraýsyz qaldyrmaýy kerek. Sý ústindegi qaıǵyly oqıǵalardyń basym bóligi eresekterdiń salǵyrttyǵynan bolady, – dep eskertti ShQO TJD ókilderi.
Jaǵajaılardaǵy tártipti tek qutqarýshylar ǵana baqylamaıdy. Reıdterge polıtsııa qyzmetkerleri, volonterler, ákimdik ókilderi jáne TJM áskerı qyzmetshileri de qatysady.
Qutqarýshylardyń aıtýynsha, jabdyqtalmaǵan jerlerde shomylý áli de oqys oqıǵalardyń basty sebebi bolyp otyr. Ásirese aǵysy qatty ári tereńdigi kúrt ózgeretin ózen ýchaskeleri asa qaýipti.
Aıta keteıik, buǵan deıin Óskemendegi «Kógildir kólder» jaǵajaıy jaz maýsymyna deıin ashylmaýy múmkin ekenin jazdyq.
