ShQO-da bıyl zańsyz jumys istegen 180-nen astam sheteldik jaýapqa tartyldy
ÓSKEMEN. KAZINFORM – Shyǵys Qazaqstan oblysynda jyl basynan beri zańsyz jumys istegen 180-nen astam sheteldik azamat jaýapqa tartyldy.
ShQO Polıtsııa departamenti baspasóz qyzmetiniń málimetine súıensek, tártip saqshylary óńirde sheteldikterdi zańsyz jumysqa tartý faktileriniń jolyn kesý maqsatynda jan-jaqty tekserý júrgizip jatyr. Sonyń nátıjesinde jyl basynan beri tıisti ruqsat qujattarynsyz jumys istegen 183 sheteldik azamat jaýapqqa tartyldy.
Kezekti zańbuzýshylyq faktisi jaqynda júrgizilgen tekserýler barysynda belgili boldy. Tártip saqshylary Óskemendegi qurylys nysandarynyń birinen ýákiletti organnyń ruqsatynsyz eńbek etip júrgen kórshiles memlekettiń 22 azamatyn anyqtady. Quqyq buzýshylarǵa qatysty ákimshilik shara qoldanyldy.
Sheteldikterge 25 AEK kóleminde aıyppul salyndy. Sondaı-aq olar 1-den 3 táýlikke deıingi merzimge ákimshilik qamaýǵa alyndy. Kóshi-qon zańnamasyn óreskel buzǵandarǵa qatysty sot sheshimimen el aýmaǵynan shyǵarý týraly qaýly qabyldandy.
Zańsyz áreketke jol bergen jumys berýshi de jaýapsyz qalmady. Sheteldik jumys kúshin zańsyz tartqany úshin oǵan 100 AEK kóleminde aıyppul salyndy.
Eske salsaq, osyǵan deıin Túrkistan oblysynda jyldyń alǵashqy úsh aıynda 7700-den astam azamat kóshi-qon zańyn buzǵany habarlanǵan.
