ShQO-da bıyl memleketke keltirilgen shyǵynnyń 2,1 mlrd teńgesi qaıtaryldy
ÓSKEMEN. KAZINFORM — Shyǵys Qazaqstan oblysynda 2026 jyldyń basynan beri memleketke keltirilgen 2,1 mlrd teńge kólemindegi shyǵyn óteldi.
Bul týraly ShQO boıynsha Ekonomıkalyq tergep-tekserý departamenti basshysynyń orynbasary Tımýr Muqanov málimdedi.
Onyń aıtýynsha, eń rezonansty qylmystyq isterdiń biri — «Óskemen áýejaıy» AQ-nyń burynǵy basshylyǵyna qatysty is. Sot aıyptalýshylardy qyzmettik ókilettikterin teris paıdalaný, asa iri mólsherde múlikti jymqyrý jáne qylmystyq jolmen alynǵan kiristerdi zańdastyrý boıynsha kináli dep tanydy. Memleketke keltirilgen 157 mln teńge shyǵyn ótelip, kináliler sottaldy.
— Sondaı-aq memlekettik sýbsıdııalardy zańsyz alý deregi boıynsha qozǵalǵan is te mańyzdy nátıjelerdiń biri boldy. Sharýa qojalyǵynyń basshysy jalǵan qujattardy paıdalaný arqyly 374 mln teńgeden astam memlekettik sýbsıdııany zańsyz alǵan. Sot oǵan múlkin tárkileı otyryp, 6 jyl 6 aı merzimge bas bostandyǵynan aıyrý jazasyn taǵaıyndady, — deıdi Tımýr Muqanov.
Bıyl Ekonomıkalyq tergep-tekserý departamenti UQK jáne tabıǵat qorǵaý prokýratýrasymen birlesip Marqakól aýdanynda zańsyz altyn óndirgen toptyń qyzmetin toqtatty. Arnaıy tehnıka, óndiristik jabdyqtar jáne basqa da zattaı dáleldemeler tárkilendi. Qazirgi ýaqytta memleketke keltirilgen shyǵyn kólemi anyqtalyp jatyr.
Sonymen qatar Ulan aýdanynda altyndy zańsyz óndirý faktisi boıynsha qylmystyq is boıynsha sot úkimi shyǵaryldy. Zańsyz aınalymnan quny 380 mln teńgeden asatyn 6 keliden astam altyn, arnaıy tehnıka tárkilendi. Memleketke keltirilgen shyǵyn 300 mln teńgeden asty. Qylmystyq shemany uıymdastyrýshylardyń múlki tárkilenip, 4 jylǵa bas bostandyǵynan aıyryldy.
Eske salsaq, osyǵan deıin ShQO-da Qytaı azamattary qatysqan zańsyz altyn óndirý isi boıynsha úkim shyqqany habarlanǵan.
