ShQO-da bıyl maldyń jolǵa shyǵyp ketýi saldarynan 11 jol apaty boldy
ÓSKEMEN. KAZINFORM – Shyǵys Qazaqstan oblysynda maldyń jolǵa shyǵyp ketýinen bolǵan jol-kólik oqıǵalarynyń jıileýine baılanysty respýblıkalyq mańyzdaǵy tasjoldarda qaýipsizdik sharalary kúsheıtildi.
Jyl basynan beri óńirde maldyń jolǵa shyǵýy saldarynan 11 jol apaty tirkelip, sonyń saldarynan 15 adam zardap shekken. Apattardyń aldyn alý maqsatynda endi kólik kóp júretin respýblıkalyq joldardyń boıyna temir torly qorshaýlar ornatylyp jatyr.
Atalǵan jumystar eń áýeli Ulan, Samar jáne Tarbaǵataı aýdandarynda qolǵa alyndy. Sebebi osy jerlerde oqys oqıǵalar eń jıi tirkeledi. Josparǵa sáıkes, jalpy uzyndyǵy 20 shaqyrymnan astam qorshaý qoıylmaq.
- Qorshaý ornatylatyn ýchaskeler sońǵy jyldardaǵy jol apattarynyń taldaýy negizinde tańdaldy. Bul mańdarda sharýa qojalyqtary ornalasqan, - deqdi «Qazservıs» JShS ShQO fılıalynyń qaýipsizdik bóliminiń mamany Erkin Itchanov.
Onyń aıtýynsha, merdiger uıymdar qojalyq ıelerine maldy jaıylymǵa aıdaý kezinde kedergi bolmas úshin jyljymaly sektsııalar ornatý múmkindigin de qarastyryp jatyr.
Jergilikti turǵyndar bastamany qoldap otyr. Ulan aýdanyndaǵy sharýalardyń biri byltyr jolǵa qoı shyǵyp ketkennen keıin, zardap shekkenderge ótemaqy tóleýge májbúr bolǵanyn aıtty.
- Maldyń jolǵa shyǵyp ketkenin biz de qalamaımyz. Sonyń saldarynan maldyń da, adamnyń da ómirine qaýip tónedi. Qorshaý qoıylsa, mundaı jaǵdaılar azaıar edi, - deıdi Ulan aýdanyndaǵy kásipkerlerdiń biri.
Oǵan qosa, jol qyzmetteri men polıtseıler mal ıelerine jaryq shaǵylystyratyn lentalar taratyp jatyr. Bul lentalar malǵa taǵylyp, júrgizýshilerge maldy alystan kórýge múmkindik beredi.
ShQO boıynsha «QazAvtoJol» UK» AQ fılıalynyń málimetinshe, bıyl óńirde 23 shaqyrym qorshaý jáne 9 shaqyrymǵa jýyq qardy toqtatatyn qalqan ornatylady.
Eske salsaq, osyǵan deıin ShQO-da qaıyqtan qulap ketken adamnyń denesi tabylǵany habarlanǵan.