ShQO-da bıyl quny 690 mln teńge bolatyn jer ýchaskeleri memleketke qaıtaryldy
Jyl basynan beri ShQO prokýratýra organdary memleket menshigine quny 690 mln teńge bolatyn 40 myń ga 119 jer ýchaskesin, onyń ishinde jalpy aýdany 430 mln teńgeden asatyn 37 myń ga paıdalanylmaǵan 101 jaıylym ýchaskesin qaıtardy, dep habarlaıdy Kazinform.
Aımaqta jer zańnamasynyń saqtalýyn qadaǵalaý aýmaqtyq prokýratýralardyń turaqty baqylaýynda. Atap aıtqanda, Samar aýdanynyń prokýratýrasy ShQO kásipkerler palatasymen birlesip, jer zańnamasy normalarynyń saqtalýyna taldaý júrgizgen. Jergilikti atqarýshy organ osy jyly jeke jáne zańdy tulǵalarǵa jer ýchaskelerin ýaqytsha óteýli jer paıdalaný quqyǵyn berý boıynsha 16 konkýrs ótkizbegeni anyqtaldy.
«Aýdan prokýratýrasynyń qadaǵalaý aktisi boıynsha kórsetilgen buzýshylyqtar úshin ákimdiktiń jer qatynastary bóliminiń basshysy Ákimshilik quqyq buzýshylyq týraly Kodekstiń 137-babymen ákimshilik jaýapkershilikke tartyldy. Samar aýdandyq sotynyń 2023 jylǵy 27 qazandaǵy qaýlysymen oǵan 1,1 mıllıon teńge aıyppul túrinde ákimshilik jaza qoldanyldy (qaýly zańdy kúshine engen joq).
Azamattar men zańdy tulǵalardyń buzylǵan quqyqtaryn qalpyna keltirý maqsatynda prokýratýranyń aralasýynan keıin osy jyldyń 31 qazanynda aýdan ákimdigi jer paıdalaný quqyǵyn berý boıynsha konkýrstyq rásimderdi ótkizý týraly habarlama joldady», - dep jazdy baqylaýshy organnan.
Glýbokoe aýdany prokýratýrasynyń tekserýimen aýdan aýmaǵynda 42 myń ga jaıylym óz maqsatymen paıdalanylmaıtyny anyqtaldy. Nátıjesinde, Glýbokoe aýdany ákiminiń atyna qadaǵalaý aktisi engizildi, búgingi kúni memleketke jalpy aýdany 600 gektar jáne quny 4,8 mln teńgeni quraıtyn 10 jer ýchaskesi qaıtaryldy.
Paıdalanylmaıtyn jerlerdi qaıtarý jumystary jalǵasýda.
