ShQO-da bıyl quqyǵy buzylǵan tutynýshylarǵa 37 mln teńge qaıtaryldy

ÓSKEMEN. KAZINFORM – Shyǵys Qazaqstan oblysynda jyl basynan beri quqyǵy buzylǵan tutynýshylarǵa 37 mln teńge qaıtaryldy.

ShQO saýda jáne tutynýshylardyń quqyqtaryn qorǵaý departamentiniń málimetine súıensek, bıyl azamattardan 1149 ótinish kelip tústi. Óńir turǵyndary kóbine bólshek saýda salasyndaǵy zańbuzýshylyqtarǵa, atap aıtqanda sapasyz taýarlardyń satylýyna, taýardy qaıtarý jáne aıyrbastaý kezindegi qıyndyqtarǵa, turmystyq qyzmetterdiń sapasyz kórsetilýine shaǵymdanǵan.

- Sonymen qatar elektrondy saýdaǵa qatysty ótinishter sanynyń artqany baıqalady. Taýardyń sıpattamasyna sáıkes kelmeýi men jetkizýdiń keshiktirilýi eń ózekti máselelerdiń biri bolyp otyr. Jalpy jyl basynan beri quqyǵy buzylǵan tutynýshylarǵa 37 mln teńge qaıtaryldy, - deıdi departament basshysy Ashat Saǵıdoldın.

Tutynýshylardyń buzylǵan quqyqtaryn qalpyna keltirý maqsatynda 37 tekserý júrgizilip, sonyń nátıjesinde 841 myń teńge somasyna 18 ákimshilik aıyppul salynǵan. Sondaı-aq 22 nusqama men 2 eskertý berildi.

- Áleýmettik mańyzy bar azyq-túlik taýarlarynyń baǵasyn baqylaýǵa erekshe kóńil bólingen. Bıyl 182 kásipker ákimshilik jaýapkershilikke tartylyp, salynǵan aıyppuldardyń jalpy somasy 2 mln teńgeden asty. Zańbuzýshylyqtar kóbine Óskemen qalasynda, Ulan jáne Shemonaıha aýdandarynda anyqtaldy, - deıdi A.Saǵıdoldın.

Eske salsaq, osyǵan deıin BQO-da azyq-túlik baǵasyn negizsiz kótergen 177 kásipker jaýapqa tartylǵany habarlanǵan.