ShQO-da bıyl ınternet-alaıaqtyqtyń 300-ge jýyq faktisi tirkeldi
ÓSKEMEN. KAZINFORM – Shyǵys Qazaqstan oblysynda jyl basynan beri ınternet-alaıaqtyqtyń 296 faktisi tirkeldi. Bul ótken jyldyń sáıkes kezeńimen salystyrǵanda 5 jaǵdaıǵa az.
Aqparattyq tehnologııalardyń damýyna baılanysty alaıaqtardyń ádis-tásilderi de barǵan saıyn kúrdelenip keledi. ShQO polıtsııa departamentiniń málimetinshe, ınternet-alaıaqtyqtyń eń keń taralǵan túrleriniń biri – jalǵan kýrerlik qyzmetter arqyly jasalatyn aldaý.
– Alaıaqtar ózderin CDEK kýrerlik qyzmetiniń ókilderi retinde tanystyryp, sizge sálemdeme kelgenin habarlaıdy. Keıinnen SMS arqyly kelgen kodty suraıdy. Biraz ýaqyttan soń olar qaıta baılanysyp, ózderin «eGov» portalynyń qyzmetkerleri retinde tanystyryp, azamattyń jeke derekterine alaıaqtar qol jetkizýge tyrysyp jatqanyn, sondyqtan olardy shuǵyl túrde buǵattaý qajet ekenin aıtady. Osy maqsatta qaıtadan kod surap, beınetekserýden ótýge kóndiredi. Nátıjesinde azamattar óz jınaqtarynan aıyrylyp qalýy múmkin, - dedi ShQO Kıberqylmyspen kúres basqarmasy bastyǵynyń mindetin atqarýshy Bekjan Malǵajdarov.
Tártip saqshylary kúmándi siltemelerge ótpeýge, SMS-kodtardy bógde adamdarǵa aıtpaýǵa jáne jeke derekterdi úshinshi tulǵalarǵa bermeýge shaqyrdy.
Budan bólek, ınternet-dúkender, páter jaldaý jáne qala syrtyndaǵy demalys oryndary salasynda da alaıaqtyq jaǵdaılary jıi kezdesedi. Alaıaqtar jalǵan habarlandyrýlar ornalastyryp, azamattardyń senimine kiredi. Sondyqtan aldyn ala tólem jasaýǵa bolmaıdy.
– Qazirgi ýaqytta óńirde ınternet-alaıaqtyqpen kúres belsendi túrde júrgizilýde. Kıberqylmyspen kúrestegi eń tıimdi ádis – aldyn alý sharalary. Polıtsııa qyzmetkerleri turǵyn úılerdi aralap, jadynamalar taratyp, halyq arasynda túsindirý jumystaryn júrgizýde. Jalpy jyl basynan beri oblysta ınternet-alaıaqtyqtyń 296 faktisi tirkeldi. Bul ótken jyldyń sáıkes kezeńimen salystyrǵanda 5 jaǵdaıǵa az, - delingen habarlamada.
Eske salsaq, osyǵan deıin elimizdiń 17 turǵyny qajylyqqa baram dep, alaıaqqa aldanǵany habarlanǵan.
