ShQO-da bıyl balyq aýlap júrgen 6 adam sýǵa batyp ketti
ÓSKEMEN. KAZINFORM — Shyǵys Qazaqstan oblysynda jyl basynan beri balyq aýlaý kezinde alty adam sýǵa batyp kóz jumdy.
Qaıǵyly jaǵdaılar Shemonaıha, Tarbaǵataı, Kúrshim aýdandarynda jáne Óskemen qalasynyń mańynda tirkelgen.
Kúzdiń bastalýymen aýa raıy jıi qubylyp, sý temperatýrasynyń tómendeýine baılanysty sýdaǵy jazataıym oqıǵalardyń qaýpi de arta tústi.
— Kóbinese adamdar sýdaǵy qarapaıym qaýipsizdik talaptaryn elemeı jatady. Jıi jiberiletin qateliktiń biri — qutqarý keýdeshesin «tek bar bolsyn» degen nıetpen alyp, ony qaıyqtyń túbinde ustaý. Al keýdeshe sýǵa shyqqan sátten bastap jaǵaǵa oralǵanǵa deıin adamnyń ústinde bolýy kerek. Qaıyqtyń eskirgen nemese shamadan tys júktelgen kúıde, ásirese daýyldy aýa raıynda sýǵa shyǵýy qaıǵyly jaǵdaıǵa ákelip soǵýy múmkin, — dep habarlady ShQO TJD.
Qaıǵyly oqıǵalardyń aldyn alý maqsatynda qutqarýshylar polıtsııa qyzmetkerleri jáne eriktilermen birlesip, ózen-kólderdegi reıdtik sharalardy kúsheıtti.
Qaıyqpen balyq aýlaıtyn azamattarǵa qaýipsizdik talaptaryn saqtaýdyń mańyzdylyǵy eskertilip jatyr.
Eske salsaq, osyǵan deıin Kaspııde úsh adam mingen qaıyq teńizge aǵyp ketkeni habarlanǵan.
