ShQO-da bıyl balasyna alıment tólemegen 21 adam sottaldy
ÓSKEMEN. KAZINFORM – Shyǵys Qazaqstan oblysynda jyl basynan beri balasyna alıment tólemegen 21 adamǵa sot úkimi shyqty.
Óńirde bıyl alıment tóleýden jaltarǵan ata-analarǵa qatysty 43 qylmystyq is qozǵaldy. Onyń ishinde 26 is boıynsha materıaldar sotqa joldanǵan.
ShQO kámeletke tolmaǵandardyń isteri jónindegi mamandandyrylǵan soty 21 aıyptaý úkimin shyǵardy. Sottalǵan 20 adamǵa bas bostandyǵyn shekteý jazasy taǵaıyndaldy. Al sot sheshimderi men sot oryndaýshylarynyń talaptaryn elemeýdi jalǵastyrǵan taǵy bir boryshker túrmege qamaldy.
— Oblysta alıment boıynsha bereshek kólemi áli de joǵary. Tek Óskemen qalasynyń ózinde balalardyń paıdasyna alıment óndirý boıynsha 6,5 myńnan astam atqarýshylyq is júrgizilgen. Olar shamamen 9 myń balanyń múddesine qatysty. Myńnan astam atqarýshylyq is boıynsha alıment bereshegi jınalǵan. Al tólenbegen alımenttiń jalpy somasy 1,5 mlrd teńgeden asyp otyr, — dep habarlady ShQO prokýratýrasynan.
Eske salsaq, buǵan deıin Mańǵystaý oblysynda 37 mln teńge alıment óndirilip, 25 boryshker jaýapqa tartylǵany habarlanǵan.
