ShQO-da bıyl ańshylarǵa 700-den astam qasqyrdy atýǵa ruqsat berildi
ÓSKEMEN. KAZINFORM – Shyǵys Qazaqstan oblysynda qasqyr sanyn retteý sharalary kúsheıtilip jatyr.
Óńirde qasqyr sanyn retteý maqsatynda osy jyly 736 túz taǵysyn atýǵa ruqsat berildi. Bul týraly oblystyq ańshylar jáne balyqshylar qoǵamdyq birlestiginen málim etti.
– Atalǵan shara Shyǵys Qazaqstandaǵy aýyldyq okrýgterde jyrtqyshtardyń tórt túlikke shabý derekterin azaıtýǵa jáne ahýaldy turaqtandyrýǵa baǵyttalǵan. Qasqyrdy atýǵa ruqsattar tıisti kýáligi bar, qarýdy saqtaý men alyp júrýge ruqsaty rásimdelgen ańshylarǵa ǵana berildi. Ruqsattardyń qoldanylý merzimi – 2026 jylǵy 31 jeltoqsanǵa deıin, - delingen aqparatta.
Búginde oblystaǵy qasqyr sany 1 600-den asady. Retteý jumystary tek qoldanystaǵy zańnama men ańshylyq qaǵıdalaryna sáıkes júrgizilýi tıis.
Eske salsaq, osyǵan deıin Abaı oblysynda qasqyrdy baılap qoıǵandardyń vıdeosyna baılanysty polıtsııa tekserý júrgizgeni habarlanǵan.