ShQO-da bıyl 800-ge jýyq adam bankrottyqqa ótinish bergen

ÓSKEMEN. KAZINFORM – Shyǵys Qazaqstan oblysynda jyl basynan beri 790 adam bankrottyqqa ótinish bergen.

Shyǵys Qazaqstan oblysy boıynsha Memlekettik kirister departamentine bıyl sottan tys bankrottyq týraly 790 adamnan ótinish kelip tústi. Onyń 54-i bankrot dep tanylǵan.

«2023 jylǵy naýryz aıynda qabyldanǵan «QR azamattarynyń tólem qabilettiligin qalpyna keltirý jáne bankrottyǵy týraly» Zań kúshine engen bolatyn. Jeke tulǵalardyń bankrottyǵynyń ótinish berý rásimi sottan tys bankrottyǵy, sot bankrottyǵy jáne tólem qabilettiligin qalpyna keltirý sııaqty úsh túrge bólinedi. Barlyq úsh protsedýrany tek boryshker ǵana bastaıdy, ıaǵnı nesıe berýshi nemese ózge kredıtor boryshkerge qatysty bul rásimderdi qoldanýǵa quqyǵy joq», - deıdi departamenttiń dármensiz boryshkerlermen jumys basqarmasynyń basshysy Saıran Ýálıbekova.

Zań qabyldanǵan ýaqyttan bastap óńir boıynsha sottan tys bankrottyq týraly 1927 adam ótinish bergen. Onyń ishindegi 420 adam bankrot dep tanyldy.

«Eger borysh somasy 5,9 mln teńgeden aspasa, jeke múligi bolmasa jáne ótinish bergen kúnnen bastap qatarynan 12 aı ishinde mindettemeleri ótelmegen bolsa sottan tys bankrottyq rásim bankter, MQU jáne kollektorlyq agenttikter aldyndaǵy qaryzdar boıynsha qoldanylady. Sot bankrottyǵy boryshkerdiń múlkin ótkizý múmkindigimen 5,9 mln teńgeden astam boryshtar kezinde qoldanylady. Tólem qabilettiligin arttyrý tabysy bar azamattarǵa qaryzdaryn 5 jylǵa deıin qaıta qurylymdaýǵa múmkindik beriledi, - deıdi Saıran Ýálıbekova.

Aıta keteıik, azamattar bankrottyqqa elektrondyq úkimet portaly arqyly (eGov.kz.), e-salyq azamat nemese eGov mobıldi qosymshalarynda ótinish bere alady.