ShQO-da bıyl 50 adam qyzylshamen aýyrdy
ÓSKEMEN. KAZINFORM – Shyǵys Qazaqstan oblysynda 2026 jyldyń basynan beri qyzylshamen aýyrǵandar sany bes ese tómendedi.
Bul týraly ShQO Canıtarııalyq-epıdemıologııalyq baqylaý departamentimen málim etti.
Ótken jyly óńirde qyzylsha aýrýy keń taraǵan bolatyn. Al osy jyldyń alǵashqy alty aıynda óńirde 50 jaǵdaı tirkeldi. Byltyr osy kezeńde 248 adam qyzylshamen aýyrǵan edi.
- Bıyl da naýqastardyń basym bóligi balalar bolyp otyr (33 jaǵdaı). Ótken jyldyń alǵashqy jartyjyldyǵynda qyzylshaǵa shaldyqqan balalar sany 156 bolǵan. Qyzylsha juqtyrǵandardyń 28-i Óskemen qalasynyń turǵyndary. Ekinshi orynda Tarbaǵataı aýdany (15 jaǵdaı) tursa, Altaı jáne Zaısan aýdandarynda eki adamnan qyzylsha juqtyrǵan. Qalǵan bir jaǵdaılar Rıdder qalasy, Glýbokoe jáne Ulan aýdandarynda anyqtalǵan, - delingen aqparatta.
Tirkelgen 50 jaǵdaıdyń 23-i ártúrli sebepke baılanysty vaktsına almaǵan adamdar arasynda bolǵan. Onyń ishinde jeti bala vaktsına saldyratyn jasqa tolmaǵan. Segiz jaǵdaıda ata-analar vaktsınaǵa úzildi-kesildi qarsy bolyp, balalaryna ekpe saldyrýdan bas tartqan.
Bir jasqa deıingi balalardyń 39,3 paıyzy qyzylshaǵa qarsy vaktsınanyń alǵashqy dozasyn alǵan. Al alty jastaǵy balalardyń 37,3 paıyzy vaktsınanyń ekinshi dozasymen qamtylǵan.
Ýaqytyly vaktsına almaǵan turǵyndardy qyzylshaǵa qarsy ımmýndaý jumystary da jalǵasyp jatyr. Qosymsha ımmýndaý aıasynda bıyl 7-18 jas aralyǵyndaǵy balalardyń 46,6 paıyzy vaktsına aldy.
Eske salsaq, osyǵan deıin BQO-da qyzylshamen aýyrǵan 270-ten astam adamnyń basym bóligi ekpe almaǵany habarlanǵan.
