ShQO-da bıyl 380 keliden astam esirtki tárkilendi
ÓSKEMEN. KAZINFORM - Shyǵys Qazaqstan oblysynda jyl basynan beri esirtkige qatysty 261 qylmys jasalǵan.
Oblystyq prokýratýra baspasóz qyzmetiniń málimetine súıensek, bıyl óńir boıynsha 261 esirtki qylmysy tirkeldi. Onyń ishindegi 120-y (46%) - esirtki satý faktileri. 166 adam qylmystyq jaýapkershilikke tartylǵan. Zańsyz aınalymnan 380 keliden astam esirtki, onyń ishinde 132 keli sıntetıkalyq esirtki tárkilendi.
Sıntetıkalyq esirtki óndiretin 2 narkolaboratorııa jáne kannabıs ósiretin 1 fıtolaboratorııa joıyldy.
- Osy maqsatta oblystyń mektepteri men joǵary oqý oryndarynda esirtkiniń zııany týraly taqyryptyq sabaqtar ótkizý qajet. Sabaq barysynda oblys prokýratýrasynyń bastamasymen túsirilgen «Erkindik ıllıýzııasy» atty derekti fılm kórsetiledi. Onda jeńil aqshaǵa qumar bolǵan jastardyń ómirinen alynǵan naqty oqıǵalar baıandalady, - deıdi oblys prokýrory Almat Baısholaqov.
Sıntetıkalyq esirtkiniń óńir aýmaǵynda baqylaýsyz jáne erkin taralýyna qarsy is-qımyldyń jańa mehanızmi retinde oblys prokýratýrasy ákimdik jáne polıtsııa departamentimen birlesip «STOP esirtki!» pılottyq jobasyn júzege asyrýdy usyndy. Bul joba boıynsha azamattarǵa esirtki, ásirese sıntetıkalyq túrleriniń zańsyz aınalymy týraly rastalǵan málimetterdi habarlaǵany úshin aqshalaı syıaqy beriledi.
Eske salsaq, osyǵan deıin Jetisý oblysynda jyl basynan beri 692 keli esirtki tárkilengeni habarlanǵan.