ShQO-da bıyl 14 adam kene entsefalıtin juqtyrdy
ÓSKEMEN. KAZINFORM — Shyǵys Qazaqstan oblysynda kóktem shyqqaly beri 3 887 adamdy kene shaqqan.
ShQO sanıtarlyq-epıdemıologııalyq baqylaý departamentiniń málimetinshe, keneden zardap shekkenderdiń tórtten biri — balalar.
— 14 jasqa deıingi 1 146 balany kene shaqqan. Qala, aýdandardyń ishinde Óskemen turǵyndary medıtsınalyq kómekke eń kóp júgingen. Onda 1 837 adam, ıaǵnı jalpy kórsetkishtiń jartysyna jýyǵy keneden zardap shekti. Eń az kórsetkish tirkelgen — Ulan aýdany. Munda bar bolǵany 11 jaǵdaı anyqtalǵan, — delingen aqparatta.
Jyl basynan beri óńirdiń endemııalyq aýmaqtarynda kene entsefalıtiniń 14 jaǵdaıy jáne ıksodty kene borrelıozynyń, ıaǵnı Laım aýrýynyń 10 jaǵdaıy zerthanalyq jolmen rastaldy.
— Kene entsefalıtiniń taralý geografııasy aıtarlyqtaı keń. Aýrý jaǵdaılary Óskemen men Rıdder qalalarynda, Altaı, Úlken Naryn, Zaısan, Shemonaıha jáne Katonqaraǵaı aýdandarynda tirkelgen. Kene borrelıozy Óskemen, Rıdder qalalarynda, Altaı jáne Zaısan aýdandarynda anyqtaldy, — delingen habarlamada.
Aýrýǵa shaldyqqandardyń arasynda balalar da bar. Kene entsefalıti 10 jastaǵy bala men 16 jastaǵy jasóspirimnen zerthanalyq jolmen rastalǵan.
Eske salsaq, osyǵan deıin SQO-da bıyl jeti adam kene entsefalıtin juqtyrǵany habarlanǵan.
