ShQO-da bıatlonnan QR chempıonaty bastaldy
ASTANA. QazAqparat - Rıdder qalasynda bıatlonnan jastar, jasóspirimder jáne qyzdar arasyndaǵy Qazaqstan Respýblıkasynyń chempıonaty bastaldy. Chempıonatta barlyǵy 7 quramadan 93 sportshy ózara baq synasýda, dep habarlaıdy «QazAqparat» HAA tilshisi.
ShQO Dene shynyqtyrý jáne sport basqarmasynyń baspasóz qyzmetiniń habarlaýynsha, saıysqa shyǵysqazaqstandyq bıatlonshylardan bólek, Pavlodar, Aqtóbe, Aqmola, Soltústik Qazaqstan, Qaraǵandy oblysy men Almaty qalasynyń sportshylary kelgen.
«Jeńimpazdar men júldegerler bıatlonnyń mynadaı túrleri boıynsha ózara myqtyny anyqtaıdy: estafetalyq jarys 1+1, 2+2, sprınt, iz kesý saıysy, sondaı-aq, jekeleı jarys. Jalpykomandalyq saıys boıynsha jeńisten úmitti komandalardyń biri Shyǵys Qazaqstan oblysynyń quramasy bolyp tabylady», - dep habarlaıdy vedomstvodan.
Bıatlonnan Shyǵys Qazaqstan sportshylarynyń bas bapkeri Aleksandr Barılo atalmysh chempıonat QR jasóspirimder jáne jastar komandasyn jasaqtaý úshin ótkizilip jatqanyn aıtady. Chempıonat qorytyndysynan keıin jasaqtalǵan qurama aqpan aıynyń sońynda Estonııanyń Otepıa qalasynda ótetin Álem chempıonatynda óner kórsetedi.
