ShQO-da bes birdeı jol jobasy júzege asady
ÓSKEMEN. QazAqparat - Shyǵys Qazaqstanda «Nurly jol» baǵdarlamasynyń aıasynda «Ortalyq-Shyǵys» dálizi qaıta jaraqtaýdan ótedi, dep habarlaıdy QazAqparat tilshisi.
ShQO ákiminiń baspasóz qyzmeti taratqan aqparat boıynsha, qaıta jaraqtaý jumystary «Omby-Maıqapshaǵaı», «Taskesken-Baqty», «Óskemen - Zyrıan - Úlken Naryn - Katonqaraǵaı - Rahman qaınary» baǵyttaryn qamtyp, jalpy uzyndyǵy 161 shaqyrym joldy kúrdeli jóndeýge múmkindik bermek.
Oblys ákimi Danıal Ahmetovtiń aıtýynsha, osy dáliz arqyly Reseıdiń Sibir aımaǵynan Qazaqstan arqyly Qytaıdyń ShUAR provıntsııasyna tóte jol ashylmaq.
«Reseıdiń Sibir oblysynan Qazaqstan arqyly Qytaıdyń ShUAR provıntsııasyna qysqa jol ashýǵa múmkindik bar. Osylaısha, Prezıdentimizdiń bizdiń aımaqqa qatysty aıtqan barlyq tapsyrmalaryn naqty júzege asyramyz. Ol úshin jolaýshylar kóligi jáne avtokólik joldary basqarmasyna óńirdegi joldardyń 70-85 paıyzynyń jaǵdaıyn jaqsartýdy tapsyramyn. - dedi Danıal Ahmetov.
Bıyl oblysta respýblıkalyq mańyzy bar joldardyń 138 shaqyrymyn ortasha jóndeý josparlanǵan. Budan bólek, Qazaqstan-Reseı shekarasyndaǵy «Aýyl» jáne «Ýba» baqylaý-ótkizý pýnktterinde qosymsha jolaqtardyń qurylysy josparlanǵan. Bul aýmaqtyń tranzıttik áleýetin arttyrýǵa múmkindik beredi.
Aıta keteıik, Shyǵys Qazaqstan aýmaǵyn eldegi jalpy qoldanystaǵy joldardyń eń úlken bóligi, ıaǵnı 11 494.5 shaqyrymy basyp ótedi.
