ShQO-da Beloýsov ken baıytý fabrıkasy jumysyn toqtatady
ÓSKEMEN. QazAqparat – Shyǵys Qazaqstan oblysynyń Glýbokoe aýdanyndaǵy Beloýsov ken baıytý fabrıkasy jumysyn toqtatady. Bul taýarly QazAqparat KAZ Minerals tobyna silteme jasap habarlaıdy.
«KAZ Minerals toby 21 qarashadan bastap «Shyǵystústimet» JShS-ne qarasty Beloýsov ken baıytý fabrıkasynyń jumysy toqtaıtyny týraly habarlaıdy. Bıznes-protsesterdi ońtaılandyrý, shyǵyndardy azaıtý jáne resýrstardy únemdeý maqsatynda fabrıkanyń jumysyn toqtatyp, kásiporyndy konservatsııalaý týraly sheshim qabyldandy. Atalmysh fabrıkada óńdelgen Ertis shahtasynyń keni budan bylaı Nıkolaev ken baıytý fabrıkasyna jóneltiletin bolady. 2016 jyly Nıkolaev fabrıkasynda aýqymdy modernızatsııa júrgizildi jáne kásiporynnyń qýaty qosymsha shıkizat kólemin óńdeýge múmkindik beredi», - deıdi kásiporynnyń korporatıvtik baılanys jónindegi departamentiniń óńirlik menedjeri Ermek Dúzkenev.
Onyń aıtýynsha, Beloýsovkadaǵy óndiristiń jabylýy «Shyǵystústimet» JShS-niń óndiristik kórsetkishterine áser etpeıdi.
Beloýsovka ken baıtyý fabrıkasynda 246 adam jumys isteıdi. Konservatsııalaý jumystary kezeńinde kásiporynda 26 adam jumys isteıtin bolady.
«Eńbek sharttaryn buzý kezinde zańnamanyń barlyq normalary saqtalyp, ujymnyń múddeleri barynsha eskeriletin bolady. Kompanııanyń basqa kásiporyndarynda bos oryndar bolǵan jaǵdaıda jumystan bosatylatyn qyzmetkerlerge olardyń biliktilik deńgeıi men jumys tájirıbesine sáıkes keletin jumys oryndary usynylady», - deıdi kompanııa ókili.
Beloýsovka ken baıytý fabrıkasy Shyǵys Qazaqstandaǵy tarıhy baı óndiris oshaqtarynyń biri sanalady. 1945 jyly iske qosylǵan kásiporyn Ertis shahtasynyń kenin óńdep keldi.
2019 jyldyń alty aıynda munda 276 myń tonna ken óńdelip, 3,1 myń tonna kontsentratty mys, 6 myń tonna kotsentratty myrysh óndirildi. Fabrıka óziniń rekordtyq kórsetkishine 1975 jyly qol jetkizip, 807,7 myń tonna ken óńdegen bolatyn.
«Beloýsov ken baıytý fabrıkasy bizdiń baıyrǵy kásiporyndarymyzdyń biri. Ótken ǵasyrdyń 40-jyldarynan bastap jumys istep keledi. Shıkizat bazasynyń birtindep azaıýyna jáne «Shyǵystústimettiń» baıytý qýattaryn tolyq júkteý qajettiligine baılanysty biz Beloýsov fabrıkasynyń jumysyn toqtatýǵa jáne Ertis shahtasynyń kenin Nıkolaev farıkasyna jóneltýge májbúrmiz», - deıdi «Shyǵystústimet» JShS-niń basqarma tóraǵasy Ilsýr Dáýitov.
